Արմեն Ամիրյա՞ն, դու և՞ս

Արմեն Ամիրյանի՝ Մշակույթի նախարար դառնալուց հետո, մշակութային հանրությունը մեծ հույսեր էր կապում նրա հետ՝ ոլորտում բարեփոխումների, ի վերջո հասկացող մարդու հետ աշխատելու համար:

Սակայն, ինչպես ամեն ինչ, Արմեն Ամիրյանը ևս խաբեց և խաբված մնաց:

Դեռևս հանրությունը ուշքի չէր եկել Մշակույթի նախարարի այն հայտարարությունից, որ Օպերայում պետք է ռեստորաններ և սաունաներ կառուցվի, երբ Մշակույթի նախարարությունը որոշել է Վայոց ձորի քարանձավները վարձակալության տալ մասնավորին` զբոսաշրջությունը զարգացնելու համար:

Իհարկե, գաղափարը հրաշալի է, սակայն այստեղ կա մեկ բայց:

Քարանձավներից մեկում` Թռչունների քարանձավում, արդեն գրեթե 10 տարի է՝ պեղումներ են ընթանում՝ հայ և ամերիկյան կողմի հնագետների կողմից, և հենց այս քարանձավում է հայտնաբերվել 6000 տարեկան գինու հնձանը, որը Հայաստանի հպարտությունն է: Այս քարանձավում է հայտնաբերվել նաև 6000 տարեկան տրեխը, որը ժամանակին բուռն քննարումների և հրապարակումների տեղիք տվեց:

Ողջ տարածաշրջանը նման հնագիտական կենտրոն չունի, քանի որ այն միակն է, որտեղ գինի են ստացել արհեստագործական նպատակներով, ոչ տնայնագործական: Այս քարանձավում հայտնաբերվել են նաև խաղողի ճյուղեր, կարասներ, երեխայի գանգը, խաղողի կորիզներ և այլ մասունքներ:

Մինչև այսօր էլ այցելուների մուտքը հնագիտական տարածք արգելվում է, քանի որ քարանձավի պեղումների վայրում ամեն ինչ հաշվարկած է, և դեռևս մի քանի շերտ կա հողի տակից հանելու և բացահայտումների համար:

Արմեն Ամիրյանն ինչպես է պատկերացնում նման հնագիտական տարածքում զբոսաշրջության զարգացումը` անհասկանալի է:

Իհարկե, կան քարանձավներ, որոնք կարող են օգտագործվել զբոսաշրջության նպատակներով, սակայն բոլորը մեկ աղացով աղալը պրոֆեսիոնալ մոտեցում չէ:

Մագելի, Մոզրովի քարանձավներում եզակի չղջիկների տեսակներ են բնակվում, որոնք գրանցված են Կարմիր գրքում, և նրանց պահպանությունը ևս քարանձավների շահագործման պարագայում` վտանգված է:

Մեկ օրինակ բերենք: Թռչունների բացառիկ հնագիտական արժեք ներկայացնող քարանձավի կողքին կա ևս մեկ փոքրիկ քարանձավ, որտեղ ժամանակին ցանկանում էին քարանձավային ռեստորան կառուցել:

Մինչև այժմ էլ տարածքում մնացել են շինարարական առարկաներ,

իսկ գաղափարը` կիսատ:

Այնպես որ՝ նկատի ունենալով, որ հայերս ցանկացած հրաշալի գաղափար շատ արագ կարող ենք մխտռել` լավ կլինի ձեռնպահ մնալ ամեն ինչ պղտորելուց ու մխտռելուց:

Գուցե հանրությունը կարողանա փոփոխել Արմեն Ամիրյանի անհեռանկար որոշումները, ինչպես երևում է մեր երկրին Մշակույթի նախարար չի գալիս.

յուրաքանչյուրը միշտ արդարացնում է նախորդի հույսերը` ավելի վատ, քան իմ ժամանակ էր:

NEWSPRESS.am