«Առաջընթացը ՀՀԿ-ակնների ու նրանց ընտանիքի համար է…». սևազգեստ մայր (լուսանկարներ, տեսանյութ)

Խաղաղ պայմաններում զոհված զինծառայողների սևազգեստ մայրերը դիմում են ներկայացրել ՀՀ պաշտպանության նախարար Վիգեն Սարգսյանին՝ նրա հետ հանդիպման ակնկալիքով:

Ծնողների համար անհասկանալի պատճառներով նախարարը նրանց հետ նշանակել է անհատական հանդիպում:

Զոհված զինծառայող Արթուր Ղազարյանի մայրը՝ Իրինա Ղազարյանը, NEWSPRESS.am-ի հետ զրույցում նշեց, որ նախարարին ներկայացրել է իր տղայի սպանության փաստերը, սակայն վերջինս համարժեք պատասխան չի հնչեցրել.

«Ասում եմ` տեսե՛ք, ես նույնիսկ վկա ունեմ ու պատմում եմ փաստերով, ինձ պատասխանում է, թե դա իր իրավասության մեջ չէ, ու ասում է՝ ուրիշ ինչո՞վ կարող եմ օգնել… ուրիշ ինչո՞վ պետք է օգնի, եթե ես բանակ ուղարկած իմ տղայի սպանության արդար հանգուցալուծում եմ պահանջում, և նա ասում ՝ չեմ կարող… իսկ ինձ հենց դա է պետք»,- ասում է որդու կորուստը սգացող մայրը՝ հավելելով. «Վիգեն Սարգսյանն ինձ ասում ա՝ ինչի՞, բոլոր մարդիկ էդ 5 ընտանիքիդ դեմ տրամադրվա՞ծ են, որ կոծկում են գործը…»:

Տիգրան Օհանջանյանի մայրն էլ կտրում է խոսքը. «Ա՛յ հենց էդ նույն նախադասությունը բոլորիս էլ ասել է…Լա՛վ, եթե գործը բացելը իր իրավասության մեջ չէ, բաց միայն մեր տղաներին բանակ տանե՞լն է նրա գործը…»,- ասում է Գոհար Սարգսյանը:

Նա նկատում է նաև, որ սպանությունների բացահայտման գործով առաջընթաց չկա:

«Առաջընթացն ու անվտանգությունը միայն Հանրապետական կուսակցության համար է, իշխող կուսակցության համար ու իրենց ընտանիքների, դա ժողովրդի համար չէր… էլ ի՛նչ պահանջենք նրանցից…»:

Մանրամասները՝ տեսանյութում