Կարեն Կարապետյանը որոշել է «գմփացնել» ոռոգման խախուտ համակարգը

Այսօր կառավարության նիստի ժամանակ ՀՀ վարչապետ Կարեն Կարապետյանը ստիպել է Ջրային տնտեսության պետական կոմիտեի նախագահին «գմփացնել» ոռոգման համակարգը. ասել կուզի՝ ողջ Հանրապետության չոռոգվող տարածքները ոռոգել:

Բացի այդ, ակնկալվում է, որ բարեփոխումներ կլինեն, հատկապես ՋՕԸ-nերի մասով՝ և′ ֆինանսական, և′ համակարգային: Հիշեցնենք, որ ՋՕԸ-ները Հանրապետությունում գործում են 2004 թվականից, գրեթե 40 ՋՕԸ: Եվ այժմ հստակ է, որ կարելի էր ավելի խելացի գաղափար ունենալ, քան արհեստական ՋՕԸ-ների համակարգը ներդնելը ոռոգման համակարգում:

Բացի այն, որ ՋՕԸ-ների ղեկավարների պաշտոնները պետք է ընտրվեին գյուղաբնակների կողմից (ինչն այդպես չէ, հակառակը՝ այն նշանակովի էր), նաև պատահական, գործից անտեղյակ մարդիկ, համայնքային կամ մարզային ղեկավարության հետ լինելով ազգակցական ու բարեկամական կապերի մեջ՝ ստանձնում էին պաշտոնը, և ոռոգման ջուրը բաժանվում էր՝ ըստ կամեցողության:

Իսկ գումարները մսխվում էին:

Մի քանի տարի առաջ Ֆինանսների նախարարությունն ստուգումներ էր արել 4 ՋՕԸ-ում. հայտնաբերվել էին միլիոնների հասնող խախտումներ, իսկ թե ինչո՞ւ մնացած ՋՕԸ-ներում ստուգումներ չարեցին, մնաց մութ:

Չի բացառվում, որ գրեթե բոլոր ՋՕԸ-ներում նույն վիճակն է, սակայն

չեն ստուգում:

Փաստեր կան, որ այս ընթացքում ՋՕԸ-ների ղեկավարները հարստացել են, իսկ իրենց ենթակայության տակ գտնվող ոռոգելի հողերը ոռոգվում են կամայական, խողովակները և առուները մատնված են անտերության, ներտնտեսային ցանցը չի գործում՝ հատկապես Արարատի մարզում, որտեղ համայնքների առուները տարիներով ջրի երես չեն տեսել:

Ինչպե՞ս է վարչապետը Ջրային տնտեսության նոր ղեկավարի հետ

«գմփացնելու» համակարգը:

Դեռևս անհայտ է: Չէր բացառվում, որ երկրի ջրային ռեսուրսների խելացի օգտագործման պարագայում ջրամբարների շինարարության կարիք չլիներ, և երկիրը միլիոնների վարկ նորից չշալակեր, բայց դե ջրի օգտագործումը մատնված է անտերության, իսկ ջրամբարների համար վարկերից ոմանք մեծ գումարների ակնկալիք ունեն:

Ինչո՞ւ ոչ:

Անունը կդնեն երկրի ջրապահովություն և միլիոնների վարկ կվերցնեն՝ առանց այդ էլ պարտքերի տակ կքած: Ոռոգման համակարգը «գմփացնելու» փոխարեն, լավ կլիներ խելացի մեկը վարչապետին խորհուրդ տար՝ ոռոգման համակարգը, ջրային ռեսուրսները պետք է խելացի օգտագործել, ոչ թե «գմփացնել» կամ վարկեր վերցնել: Այնպես չէ, որ չի խոսվում ջրային ռեսուրսների խելացի օգտագործումից, սակայն որևէ մեկը չի անհանգստանում, թե դա ինչպես է արվելու և կամ դա ինչ է նշանակում ընդհանրապես:

NEWSPRESS.am