Իշխող կուսակցության քաղաքական աղբանոցը (լուսանկար)

Օրերս լրատվական կայքերից մեկը հրապարակել էր Գյումրիում տեղակայված աղբամաններ, որոնց վրա ԱԺ ընտրություններից մի քանի օր հետո «դրոշմվել» էր պիտակ՝ Հանրապետական կուսակցության զինանշանը: Թե ով և ինչ նպատակով է աղբամանների վրա նկարել զինանշանը, կարելի է միայն ենթադրել: Չի բացառվում, որ մարդիկ, ովքեր փորձել են «հանրապետականացնել» նույնիսկ Գյումրիի աղբամանները, չեն էլ պատկերացրել, թե որքան դիպուկ քայլ են արել. իրականում «հանրապետականացված աղբամանների» մեջ պարունակվող աղբն իր խորհուրդն ունի:

Այն, որ այսօր Հայաստանում քաղաքական դաշտը կայացած չէ, ունի իր պատճառները, որոնցից մեկը, ու թերևս կարևորագույնն այն է, որ «աղբն» այնտեղ որակ է կազմում:

Աղբակույտում հայտնվում են անդեմ կամ զոմբիացված մարդիկ, ովքեր չունեն քաղաքական կայուն արժեհամակարգ ու սկսում են գործել ու ընկալվել կենցաղային հարաբերությունների մակարդակով, որից միայն գարշահոտություն է գալիս:

Դեռ նախընտրական շրջանում կարելի էր ենթադրել, որ «փողոցային ռազբորկաների» մակարդակով հարցեր լուծող «լավ տղերքը»՝ քաղաքական գործչի շղարշով քողարկված մտնելու են նոր խորհրդարան. ընտրությունների արդյունքներն արդարացրին կանխատեսումները, ունեցանք անդեմ խորհրդարան:

Ապագա խորհրդարանը ներկայացնող կազմի գերակշռող մասն այն տեսակն է, որն Ազգային ժողովում ո՛չ թե ազգային խնդիր է լուծելու, այլ իր տեղն է ամրապնդելու և պահելու ազգի մեջ: Իհարկե, հարկ եղած դեպքում, նրանք մյուսներին կզրկեն տարածությունից և ձայներից:

Այս իրավիճակում ստացվում է այնպես, որ եթե նույնիսկ խորհրդարանում հայտնվել է նաև քաղաքական ուժ կամ քաղաքական գործիչ, որին իր մեջ ունի ազգանպաստ ամենադրական նպատակները, ապա միևնույնն է՝ նրանց ցանկացած նախաձեռնություն դատապարտված է տապալման, իսկ ավելի կոնկրետ` աղբանոց նետվելուն՝ իշխող կուսակցության քաղաքական աղբանոցը:

NEWSPRESS.am