«Ընտրակաշառքը «ցենզ» էր… ԱԺ կարող է մտնել միայն փողատեր գյադեն»

NEWSPRESS.am-ի զրուցակիցն է «Միասնություն Հայաստան» նախաձեռնության անդամ, ԳԽ նախկին պատգամավոր, նախկին քաղբանտարկյալ Ազատ Արշակյանը, ով ընտրություններին աջակցում էր Օհանյան-Րաֆֆի-Օսկանյան դաշինքին:

-Պարո՛ն Արշակյան, խորհրդարանական ընտրություններով ինչ-որ բան փոխվե՞ց Հայաստանում:

-Հայաստանում ոչինչ չի կարող փոխվել սկզբունքորեն, քանի դեռ Հայաստանը Եվրասիական միության անդամ է, և Եվրասիական միության կենտրոնում որևէ բան չի փոխվել: Այսինքն՝ սկզբունքային ոչինչ Հայաստանում հնարավոր չէ փոխել, որովհետև հայ ժողովուրդը կորցրել է փոփոխություն անելու իրավունքը և հնարավորությունները՝ միանալով Եվրասիական միությանն ու մաքսային միությանը:

-Այսինքն՝ սա մեր հասարկության ընտրությունը չէ՞ր:

-Հասարակության ընտրությունը չի կարող լինել աղքատությունը, արտագաղթը: Հասարակությունը չէր կարող ինքնասպան լինել… Հայաստանի քաղաքացիներն ինքնասպաններ չեն, նրանք այդ ընտրությունը չեն կատարել: Դա ընտրություն չէր, դա եղել է Սովետական միությունում, ընդհանրապես բոլոր բռնապետություններում այդպիսի ընտրություններ լինում են: Ուղղակի այստեղ քիչ թիվ գրեցին… մեզ տարան, մենք քվեարկեցինք և 80 տոկոսով իշխանությունը հանձնեցինք քրեաօլիգարխիկ համակարգին: Այսինքն՝ մենք դա չունեինք, որ հանձնեինք. Հայաստանի քաղաքացիներն իշխանության աղբյուրը չեն, իշխանության աղբյուրը նստած է Եվրասիական միությունում, և նա նշանակում է այստեղ իշխանություն՝ վերևից ներքև:

-Կարելի՞ էր ակնկալել նման ելք:

-Այո՛, ես էլի եմ ասել՝ Եվրասիական միությունում ընտրություններ չեն լինում: Ո՛չ Լուկաշենկոն, ո՛չ Պուտինը, ո՛չ Նազարբաևն ընտրություններին չեն մասնակցում, նրանք գնում և քվեարկություն են ստանում: Ինչո՞ւ պետք է Հայաստանում դա լիներ… Սերժ Սարգսյանը նրանցից ինչո՞վ է լավ կամ վատ:

-Ընտրություններից հետո սկսեցին խոսել, որ եղել են ընտրակաշառքներ, որոնք ազդել են ընտրության ընթացքի վրա: Ի՞նչ եք կարծում՝ Ձեր նշած իրավիճակում ընտրակաշառքները կարո՞ղ էին որևէ ազդեցություն ունենալ:

-Ընտրակաշառքը դեր չունեցավ: Դա ճիշտ նույնն է, եթե մեզ ասեին՝ որևէ տեսակի հագուստով եկեք ընտրություններին, օրինակ՝ տրեխներով և փափախով, իսկ ով տրեխով ու փափախով չգա՝ պետական հանցագործ է, կհայտնվի Շանթի կողքին (Շանթ Հարությունյանի-հեղ.)… ճիշտ այդպես էլ այդ ընտրակաշառք կոչվածն էր՝ դա ձևերից մեկն էր, այսպես ասած, այցեքարտն էր: Փափախ չդրեցին, տրեխներ չհագցրին, բայց միևնույնն է՝ նվաստացրին, նսեմացրին… Այդ ընտրակաշառքը դրա համար էր և իհարկե դա ցենզ էր, հո ամեն մի գյադագյուդա չի կարող մտնել Ազգային ժողով՝ միայն փողատեր գյադեն:

Զրուցեց Արմինե Մկրտումյանը