Վանդալի՞զմ. Տարոն Մարգարյանն ինչ ցանել է, այն էլ հնձում է

Անկախությունից հետո Հայաստանի բնությունը հետընթաց ապրեց. նախ Երևանում, նաև անտառածածկ մարզերում սկսվեցին մեծածավալ հատումներ: Իհարկե, անտառային ծածկույթի գրեթե 12 տոկոսը փորձում են թղթի վրա պահպանել, իսկ Երևանի հարցում` անհնար է:

Դեռևս 2000-ականների սկզբներին նշվում էր, որ անկախությունից հետո մայրաքաղաքի կանաչապատ տարածքները կրճատվել են 277 հեկտարով. 1989թ.-ի 1959 հեկտարի փոխարեն՝ 1999 թ.-ին Երևանում մնացել է 1682 հեկտար հասարակական օգտագործման կանաչ տարածք, և առկա է էկոլոգիական անհավասարակշռություն:

Ինչպես գիտենք, Երևանը գտնվում է կիսաանապատային գոտում: Դա հատկապես ակնհայտ է դառնում ամռան շրջանում, երբ տապը, կիզիչ արևը և փոշին բնակիչներին հիշեցնում են, որ Երևանում կանաչ տարածքները կրճատվել են, թթվածնի պակաս կա: Սա բնակիչները, իսկ վարչական և մայրաքաղաքային իշխանություննե՞րը:

Այս տարիներին Երևանում մասամբ կամ ամբողջապես հատվեց Ջրաշխարհին հարող տարածքը, Դալմայի այգիները, Օղակաձև զբոսայգու ծառեր, Նոր Նորքի այգիները. այս ցանկը կարելի է շարունակել: Անգամ գաղտնիք չէ, որ ծառահատումների «թույլտվությունը» տալիս են թաղապետարանները, մեծ հաշվով՝ քաղաքապետարանը: Վաճառում են կանաչ տարածքներ ում պատահի և ինչպես պատահի: Կարճ ասած՝ փող են աշխատում:

Հաճախ ծառահատում կատարած անձը պնդում է, որ դա գնել է քաղաքապետարանից և դա իր սեփականությունն է, իսկ քաղաքապետարանը պատժել չի կարող, քանի որ «մեջտեղում» փող է աշխատել: Իհարկե, եթե ԶԼՄ-ները շատ են «զզվեցնում», ապա մի փոքր տուգանք են նշանակում և վերջ:

Իսկ Դավթաշենում օրերս տեղի ունեցած 20 ծառերի «սպանդը» փաստեց, որ այս առումով Երևանում ոչինչ չի փոխվել: Եվ չնայած Երևանի քաղաքապետ Տարոն Մարգարյանը և վարչական շրջանի ղեկավար Ռուսլան Բաղդասարյանը հայտնել են, թե արարքի հեղինակը պատժվելու է օրենքի ամենայն խստությամբ, սակայն փաստ է այն, որ Երևանի ծառահատումների համար այս տարիներին ոչ ոք չի պատժվել:

Իսկ Դավթաշենում պարբերաբար են ծառեր հատվում, և եթե այս տարիներին խիստ պատիժ լիներ, ապա ոչ ոք չէր համարձակվի ծառ կտրել:

Տարոն Մարգարյանը հայտարարել է, թե վանդալիզմ է. Իհարկե, սա նախընտրական ձևակերպում է:

Այդ վանդալիզմը պարբերաբար է տեղի ունենում Երևանում հենց քաղաքապետարանի թողտվությամբ. Չէ՞ որ Երևանի կանաչ տարածքների պատասխանատուն և վաճառողը հենց քաղաքապետարանն է: Այսօր Ամերիկա է քաղաքապետը հայտնաբերել` գիշերո՞վ:

Իրականությունն այն է, որ քաղաքապետարանը Երևանի կանաչ տարածքներում հողատարածքներ է վաճառել մեծահարուստների և նրանց չի էլ կարող պատժել ծառահատման համար, անգամ քաղաքապետարանի տարբեր աշխատակիցներն անցած տարիներին ներքաշված էին հողավաճառքի մեքենայությունների մեջ:

Այնպես որ՝ եթե Ռուսլան Բաղդասարյանը պատժելու է 20 հաստաբուն ծառ կտրողներին, ապա կարող էր նախկինում Դավթաշենում ծառահատողներին պատժել, նույնը վերաբերում է նաև Տարոն Մարգարյանին:

Ուղղակի Երևանի բախտը ղեկավարների հարցում չի բերել:

Մայրաքաղաքային և վարչական ղեկավարությունը նայում են կանաչ ծառերին և կանաչ դոլարներ են տեսնում միայն:

NEWSPRESS.am