Աղջիկ ուզելուց առաջ, պետք է հայելու մեջ նայել. խորհրդարանը կլինի անդեմ

«Ընտրակաշառք բաժանելն այնքան անվերահսկելի էր, որ չհասկացանք ինչը ոնց եղավ»:

Լրագրողների հետ հանդիպման ժամանակ ԱԺ ընտրությունների և ընտրակաշառքների վերաբերյալ իր տեսակետը հայտնեց ԱԺ նախկին պատգամավոր Արագած Ախոյանը:
Նա, ըստ էության, չպատասխանեց հարցին, թե հաղթեց ընտրակաշա՞ռքը, թե՞ վարչական ռեսուրսը:
«Կաշառքը դարձել է թռչող ափսե, ուրվական, բոլորը դրա մասին խոսում են, բայց ոչ ոք չի տեսնում, փաստ չկա»,-ասաց Արագած Ախոյանը:
Ասուլիսի մյուս բանախոս սոցիոլոգ Ահարան Ադիբեկյանն էլ վստահ է, որ եղան մարդիկ, ովքեր երկու կուսակցությունից փող են վերցրել, բայց իրենց ձայնը տվել երրորդին:
Իսկ թե ինչու հաղթեց ՀՀԿ-ն՝ սոցիոլոգի պատասխանը միանշանակ է. «Ընտրողների կեսի ակնկալիքները կապված էին սոցիալական խնդիրների հետ, դրա համար ընտրեցին ուժեղ կուսակցություն, որն ի վիճակի էր դրանք լուծելու… հակառակ դեպքում՝ կարող էր ավելի վատ լինել»,-ասաց Ահարոն Ադիբեկյանը:
Անդրադառնալով մյուս կուսակցություններին՝ բանախոսներից Արագած Ախոյանը նկատեց, որ օրինակ «Ելք»-ը ոչ մի ռեսուրս չունենալով, բայց ճիշտ PR-ով կարողացավ ձայներ հավաքել: Իսկ «Ծառուկյան» դաշինքի հետ կապված՝ նկատեց. «Մարդ, որ գնում է աղջիկ ուզելու, վերջին անգամ իրեն հայելու մեջ պիտի նայի: ԱԺ գնացող ցանկացած մարդու խորհուրդ եմ տալիս աշխատեն իրենց վրա, ես ինքս ինձ վրա շատ եմ աշխատել…»:
Ահարոն Ադիբեկյանը նկատեց, որ ընդհանու առմամբ այս խորհրդարանը կլինի անդեմ՝ հաշվի առնելով, որ ցուցակներում հայտնվել են հասարակությանը շատ անհայտ դեմքեր: «Մեր քաղաքական գործիչների մի մասը աստղային հիվանդություն ունի և սովորելու հատկությունը 18 տարեկանում կորցրել է»,-ասաց սոցիոլոգը:
Ինչ վերաբերվում է առաջիկա ավագանու ընտրություններին, ապա նա իր կանխատեսումներն ունի. «Ավագանու կեսը կլինի ՀՀԿ, «Ծառուկյան» դաշինքը ևս կանցնի, բայց ավելի քիչ ձայնով, քանի որ Երևանում ԲՀԿ-ն ավելի քիչ համակիրներ ունի»: