Ամո՛թ Հանրապետականին, ամո՛թ «Բարգավաճին». Անահիտ Բախշյանի հույսը «Ելքն» է

NEWSPRESS.am-ի զրուցակիցն է «Ազատ դեմոկրատներ» կուսակցության անդամ Անահիտ Բախշյանը:

-Տիկին Բախշյան, ինչպե՞ս եք գնահատում տեղի ունեցած ընտրությունները և արդյոք անակնկալ տեղի ունեցա՞վ:

-Քարոզարշավի առաջին փուլում «Ազատ դեմոկրատներ» կուսակցությունը նկատում էր վերելք: Բայց երբ սկսեցին տարբեր տեսակի սոցիոլոգիական հարցումները, ամեն ինչ փոխվեց: Առաջին սոցիոլոգիական հարցումներով մենք 4 տոկոս ձայն էինք հավաքել, որից հետո ոգևորված շարունակեցինք: Սակայն հետո հրապարակվեցին ռուս սոցիոլոգների հարցումները, որոնք տարան այլ ուղղությամբ: Մարդիկ մտածեցին, որ ավելի լավ է հաղթող, անցնող ուժին ձայն տալ: Սա մեկ:

Երկրորդ՝ պարզապես որևէ տրամաբանության չի ենթարկվում այս ընտրության արդյունքը: Նույն ռուսական սոցհարցումների ժամանակ ժողովրդի 81 տոկոսը դժգոհ էր իշխանությունից, ընդ որում՝ 53 տոկոսը՝ խիստ դժգոհ, բայց գնում են ու ընտրում են իշխող կուսակցությանը:

-Կարծում եք՝ ընտրակաշա՞ռքն իր սև գործն արեց:

-Իհարկե՛, ընտրակաշառքը, վարչական ճնշումը… տարբեր տիպի ճնշումների ենթարկեցին մարդկանց, որի ազդեցության տակ էլ եղան ընտրությունները:

Դա մի կողմից, մյուս կողմից էլ՝ որքան էլ մեզ համոզեն, որ նորարարություններն օգնեցին ընտրակեղծիքների նվազեցմանը, միևնույնն է՝ ենթադրություններ կան, որ հակառակ արդյունք են տվել: Մենք նոր ենք իմանում, որ մատնահետքեր կարդացող սարքը կրկնաքվեարկություն կարող է թույլ չտալ միևնույն տեղամասում, քանի որ, օրինակ, 8-րդ տեղամասի բոլոր սարքերն իրար հետ կապված են: Սակայն 8-րդ տեղամասում ընտրողը կարող է առանց դժվարության ընտրել նաև, ասենք, 10-րդ կամ մեկ այլ տեղամասում, որտեղ սարքը նրան չի բացահայտում:

– Այն ուժերը, որոնք չանցան Ազգային ժողով, հնարավո՞ր է համախմբվեն և անցնեն փողոցային պայքարի, կամ ինչ-որ կերպ իրենց դժգոհությունը հայտնեն անարդար ընտրություններից:

-Ո՛չ, չեմ կարծում, քանի որ մենք ունենք ենթադրություններ, բայց շատ լուրջ փասեր են հարկավոր… այսօր նոր մենք իմանում ենք այդ մասին, տեղում չենք բռնացրել: Ու մենք ենթադրություններ ունենք, որ ընտրություններին ավելի քան մեկ ու կես մլն մարդ չի մասնակցել, ինչպես ներկայացվում է, այլ ավելի քիչ:
Այսինքն՝ ընտրակեղծիքները դարձյալ կրկնվեցին:

-Ի՞նչ ակնկալիքներ կարող ենք ունենալ ապագա խորհրդարանից:

-Ինձ համար թերևս միայն «Ելքի»-ն է, որ դիտարկում եմ որպես ընդդիմություն, մյուսները, հատկապես մեծամասնականով ընտրվածները, նույն գող, ավազակներն էին, որ եկան խորհրդարան: Եվ ի՞նչ պետք է անեն, որ արդարացնեն ժողովրդի սպասելիքները: Իհարկե՛, ոչինչ: Նրանք պարզապես եկել են պատսպարվեն ԱԺ-ի պատերի ներսում:

Այս առումով ամո՛թ Հանրապետականին, ամո՛թ, խայտառակ ընտրություն էր: Ե՛վ Հանրապետականին, և՛ «Բարգավաճին»… միակ հույսը «Ելքի»-ի 9 երիտասարդներն են, ում հետ կարելի է ինչ-որ հույսեր կապել: Նրանք պետք է հսկայական աշխատանքներ կատարեն… Ես նրանց վստահում եմ:

Զրուցեց Արմինե Մկրտումյանը