ՀՀԿ-ն ընտրակաշառք չի բաժանում. Վահրամ Բաղդասարյանը հերքում է

Զանգվածաբար բաժանված ընտրակաշառքներ, կուտակումներ, չկնիքված կտրոններ, կրկնաքվեարկության փորձեր. սրանք այն հիմնական ընտրախախտումներն են, որոնք արձանագրել են Վանաձորի ընտրական տեղամասերի դիտորդները:

Թիվ 23 տարածքային ընտրական հանձնաժողովի նախագահ Տիգրան Պապանյանը, սակայն, NEWSPRESS.am-ի հետ զրույցում այս խախտումները լուրջ չի որակում, ընտրությունների ընթացքի հետ կապված հիմնական խոչընդոտը նա կապում է մատնահետքերը վերցնող սարքավորումների հետ, որոնց խափանման պատճառով առաջանում են կուտակումներ:

Այն, որ նորամուծությունները միշտ իրենց հետ խնդիրներ են բերում, համամիտ է նաև Հանրապետական կուսակցության պատգամավորի թեկնածու Վահրամ Բաղդասարյանը: Նրա կարծիքով, սակայն, դա հիմնական խոչընդոտ չի կարող դառնալ: Նա մտահոգիչ չի համարում նաև այն, որ որոշ ընտրական տեղամասերում տեղադրված տեսախցիկներն իրենց չեն արդարացնում:

Վահրամ Բաղդասարյանը վստահեցնում է՝ դրանք շտկվող հարցեր են և չեն կարող խանգարել մարդկանց հոսքին: Դիտարկմանը, որ զանգվածաբար բաժանվող ընտրակաշառքի մասին լուրերում հնչում են նաև Հանրապետականների անուններ, Վահրամ Բաղդասարյանը նկատում է՝ դրանք շահարկումներ են:

«Ելք» դաշինքի պատգամավորության թեկնածու Էդմոն Մարուքյանը ևս կատարել է իր ընտրությունը, նա տեղամաս էր եկել որդու հետ: Մարուքյանը հասցրել է խոսել ընտրատեղամասերում գտնվող դիտորդների և վստահված անձանց հետ, ովքեր նրան ներկայացրել են մի շարք ընտրախախտումներ: Դրանցից նա առանձնացնում է հատկապես ընտրակաշառքներ բաժանելու հետ կապված հարցը: Նա հորդորում է ընտրողներին չհավատալ ստահոդ այն լուրերին, թե տեղադրված տեսախցիկների կամ մատնահետքերի միջոցով կարող են պարզել, թե ում են իրենք ընտրել:

«Ընտրությունը ձերն է»,- ասում է Մարուքյանը: