Սկզբունքային հողատուները և պատեհապաշտ հողատուները

ԼՂՀ ԱԳ նախկին նախարար Արման Մելիքյանը ֆեյսբուքյան իր էջում գրել է.

«Այս երկու քաղաքական ուժերին՝ Կոնգրես-ՀԺԿ դաշինքին ու իշխող ՀՀԿ-ին կարելի է դասակարգել որպես, համապատասխանաբար, սկզբունքային հողատուների և պատեհապաշտ հողատուների:

Սկզբունքային հողատուներն իրոք համոզված են, որ Հայաստանի փրկությունը հող հանձնելու միջոցով խաղաղություն հաստատելու մեջ է և ժամանակին իրենց սկզբունքայնությունն այս հարցում ապացուցեցին նաև իշխանությունից հրաժարվելով: Պատեհապաշտ հողատուներն էլ իշխանության եկան հող չհանձնելու դրոշը ձեռքներն առած, սակայն շատ չանցած մտքափոխվեցին ու գերադասեցին հողատու դառնալու գնով իշխանությունը պահելու արտաքին երաշխիքներ ստանալ:

Առաջինների համար անընդունելի է այն միտքն անգամ, որ Հայաստանը կարող է տարածքների շուրջ առևտրի խնդիրը հանել մեջտեղից ու միանգամայն այլ խնդիրների շուրջ ձևավորել բանակցությունների նոր՝ մեր արմատական շահերն ապահովող առանցքը: Նրանք կոտրվել են ժամանակին և այսօր հողատվությունը գերագույն հայրենասիրություն են հռչակել, այնպես որ դրանից հրաժարվելը նրանց համար հոգեբանորեն ինքնաոչնչացման հավասարազոր բան է և մենք պետք է հասկանանք, թե սրա հետ կապված ինչպիսի վտանգների աղբյուր կարող են նրանք դառնալ:

Պատեհապաշտների խնդիրն ավելի պարզ է՝ նրանք հիմնականում բազմիցս գունափոխված, գերազանցապես անսկզբունք մարդիկ են, ովքեր մշտապես տեղ են փնտրում ուժեղի կողքին՝ ուստի հող տալ-չտալու հարցն իրենց համար ոչ թե առաջինների պես կյանքի-մահու խնդիր է, այլ զուտ բարիքներ շռայլող իշխանությանն անձնապես մերձ լինելու հարց և նրանց դիրքորոշումն ու գործելակերպը կախված կլինի իրենց գլխին կարգված գերագույն պետի կամքից:

Հող տալու հարցում այդ ուժերի առերևույթ և ժամանակավոր միավորումը կեղծ ընկալված սկզբունքայնության և անափ անսկզբունքայնության դաշինք է, որին ներկայումս ընտրապայքարի մեջ մտած Հայաստանի այլ քաղաքական ուժերն այս պահին հակադրելու իրապես ոչինչ չունեն հատկապես այն պատճառով, որ իրենց առջև այդպիսի նպատակ չեն էլ դնում»: