Անբարոյական է մտածել, թե «հարցն այնքան կձգեն, մինչև բոլորը մահանան». հաշմանդամ օդաչուներ (տեսանյութ)

13 տարի հաշմանդամության թոշակ չստացող օդաչուները նկատում են՝ համառորեն շարունակելու են պայքարել իրենց հասանելիք գումարների համար:

«Հաշմանդամ օդաչուների միություն» ՀԿ նախագահ Ջիվան Ալավերդյանը NEWSPRESS.am-ի հետ զրույցում նշեց, որ ամբողջ փաթեթը գտնվում է փոխվարչապետ Վաչե Գաբրիելյանի մոտ և իրենք սպասում են նրան:

Նա հիշում է նաև նախկին վարչապետ Տիգրան Սարգսյանի խոսքերը՝ «Հարցն այնքան կձգեն, մինչև բոլորը մահանան»:

«Թո՛ղ չմտածեն, որ հարցը դրանով կփակվի, այդ օդաչուներն ունեն որդիներ ու թոռներ՝ իրավահաջորդներ, ովքեր կզբաղվեն այդ հարցով ու մինչև վերջ լուծում կպահանջեն: Դա անգրագետ մարդու խոսք է և անբարոյական…»,- նկատեց Ջիվան Ալավերդյանը՝ հավելելով, որ հետդարձ չկա, և իշխանությունն այլընտրանք չունի, պետք է լուծել հարցը:

Հիշեցնենք, որ աշխատանքի ընթացքում հաշմանդամություն ստացած օդաչուները դեռևս 10 տարի առաջ «Հայկական ավիաուղիներ» ընկերության կողմից ստանում էին առողջության վնասի փոխհատուցում: «Հայկական ավիաուղիները» 2006 թվականին լուծարվել է, իսկ դրանից հետո այդ գումարի վճարման պարտավորությունն ստանձնել էր Հայաստանի կառավարությունը: Սակայն մինչ օրս կառավարության կողմից վճարում չի կատարվել:

Մանրամասները՝ տեսանյութում