Ընտրակաշառքի շուկան կայուն է․ 10 հազար դրամ

Անկախությունից հետո կամաց-կամաց ձևավորվեց ընտրակաշառքի շուկա։ Փող, բարեկամներ, մոտիկներ, մի փոր հաց, մուրաբաներ և օղիներ․ կան նաև ընտրակաշառքի այլ ձևեր, որոնց մասին չենք խոսում։ Ինչևէ։ Իսկ ինչպե՞ս հասանք 2017թ. ԱԺ ընտրություններ։

Պարզվում է, որ այս տարի շուկան կայուն է՝ 10 000 դրամ։

Թեկնածուների մի մասն արդեն բաժանել է, մի մասը՝ անձնագրերը հավաքել. կբաժանեն մոտ օրերս։

Թեկնածուներ կան, որ պատրաստ են ընտրակաշառքը հասցնել 15 հազար դրամի, սակայն դեռևս ձեռնպահ են․ 10.000-ի շեմը դեռ չեն անցնում։ Իհարկե, կան բացառություններ, եթե մեկ ընտրատարածքում բաժանում են 10 000-ական դրամ, հակառակորդը, որն, ի դեպ, կրկին ՀՀԿ-ական է, բաժանում է 20 000-ական դրամ։ Շատ է ցանկանում կրկին հայտնվել Ազգային ժողովում։

Եթե վերջերս աղմուկ բարձրացրեց դպրոցների տնօրենների ցուցակագրելու խնդիրը, ապա նման իրավիճակ է սեփական խանութներում, սեփական համալսարաններում, մարզպետարաններում, համայնքապետարաններում և այլն։

Երկիրը բաժանված է կուսակցության թիմակիցների միջև՝ մեծ հաշվով։

Իսկ այս պարագայում ծանոթ-բարեկամների բախտը չի բերել, նրանց ոչ թե գումար, այլ քաղցր լեզվով են համոզում, կամ էլ՝ ախպե′ր, քե՞զ էլ փող տան։

Հատկապես ՀՀԿ-ականների կսկիծն այն է, որ նախորդ ընտրություններում գիտեին, որ իրենք ու իրենք են, իսկ այս ընտրություններին տեղյակ չեն, թե ովքեր են ընտրյալ ՀՀԿ-ականները։

Ահա այս պարագան էլ դժվարացնում է ընտրությունները։

Այսօր արդեն ընտրաշտաբներում սկսել են նախընտրական անհանգստությունները, քանի որ որոշված չէ, թե ինչպես է ապրիլի 2-ն ավարտվելու, թեկնածուները և նրանց թիմերը վերջին ճիգերն են գործադրում՝ ձայներ գնելու համար։

Չի բացառվում, որ վաղը-մյուս օրը շուկայում ընտրակաշառքի գինը բարձրանա,

սակայն այս պահին այն կայուն է։

NEWSPRESS.am