Հովիկ Աբրահամյանը պատրաստ է անգամ սատանայի հետ համագործակցել

Հովիկ Աբրահամյանը վարչապետի աթոռը կորցնելուց հետո, կարծես թե, ընդհատակ է անցել, միայն հատուկենտ լուրեր են սպրդում մամուլ։ Թե իրականում ինչ է անում կամ ինչ չի անում՝ Աբրահամյանը՝ ցույց չի տալիս։

Հայտնի է, որ նա է գլխավորում տղայի՝ Արգամ Աբրահամյանի ընտրաշտաբը, թեև փաստացի ղեկավարը նա չէ, Արարատի մարզում անհաշտ պայքար է գնում Ավշարի Գրիգորյանների, այն է՝ մարզպետ Արամայիս Գրիգորյանի, նախկին գլխավոր ոստիկանապետ Ալիկ Սարգսյանի, Մուրադ Մուրադյանի և, իհարկե, Աբրահամյանների միջև։

Ի դեպ, երբ վարչապետ Կարեն Կարապետյանն այս օրերին Արարատի մարզում էր, նրան չդիմավորեց Արտաշատի քաղաքապետ Արգամ Աբրահամյանը, ով ԲՀԿ ցուցակով մասնակցում է ԱԺ ընտրություններին։

ՀՀ ներկա և նախկին վարչապետերը, կարծես թե, չեն սիրե զմիմյանս, և Արտաշատում վարչապետի հետ հանդիպման «սրախոս» կանանց ներկայությունը ևս զարմանալի չէր։

Ասում են՝ վերջերս Հովիկ Աբրահամյանը գյուղապետաց ժողով է հրավիրել. խոսելու բան կար։

Ի դեպ, այս մարզում տարիներ շարունակ գյուղապետեր են դարձել Աբրահամյանների հետ առնչակցված անձինք․ համայնքներ կան, որ շաբաթներով աղբահանություն չի կատարվում, գիշերային լուսավորություն չկա, ոռոգման ջուր չկա գյուղերում, մշակութային հաստատությունները ողբալի վիճակում են, ճանապարհներ հաղթահարելն իսկական հերոսություն է։

Գյուղապետերը տարիներ շարունակ հիմնականում զբաղված են եղել սեփական գրպանները լցնելով, համայնքային բյուջեն մսխելով, ազգականներին աշխատանքի տեղավորելով՝ թեկուզ ակումբի վարիչ կամ գերեզմանի պահակ և այլն։ Գյուղապետերն անհանգստանալու կարիք չունեին:

Չէ՞ որ նրանք ընտրվել էին միայն Աբրահամյանների հետ «ախպերության» շնորհիվ, և

գյուղի հոգսերը որևէ գյուղապետի չեն էլ հուզում։

Այսօր, երբ Հովիկ Աբրահամյանը կիսով չափ շնորհազրկվել է, հավատարիմ գյուղապետերը կանգնել են սանահոր թիկունքին։

Եթե ժամանակին Հովիկ Աբրահամյանը պարզապես աթոռի էր ձգտում, ապա այսօր շնորհազրկումն իսկական նվաստացում է։ Երբ անփորձ կարիերիստ Աբրահամյանը բարձրանում էր աստիճաններով՝ այլ ձգտումներ ուներ:

Այժմ երկիրը կառավարելու, առնվազն՝ ղեկավարելու ցանկություն։

Հաստատ Հովիկ Աբրահամյանը ձեռքերը ծալած չի նստել, և ԱԺ ընտրություններում Աբրահամյանների համար բարեհաջող ելքից հետո դժվար է գուշակել, թե ինչ է անելու Աբրահամյանը․

նա այդքան չի բարձրացել, որ անհաջող վայրէջք կատարի։

Հանուն դրա նա իր որդուն ամուսնացրեց Գագիկ Ծառուկյանի աղջկա հետ, այնուհետև վերջին տարիներին լինելով երդվյալ ՀՀԿ-ական՝ տղային գործուղեց ԲՀԿ։ Մի բան է հաստատ, որ ընտրություններից հետո Հովիկ Աբրահամյանը դեռ «սյուրպրիզներ» ունի.

 դրա համար նա պատրաստ է անգամ սատանայի հետ համագործակցել։

NEWSPRESS.am