Չկայացած վարչապետ, առավել ևս չստացված քաղաքական գործիչ Կարեն Կարապետյանի հերթական խայտառակությունը

ՀՀԿ-ի նախընտրական քարոզարշավի ժամանակ չկայացած վարչապետ և չստացված քաղաքական գործիչ ՀՀԿ-ական Կարեն Կարապետյանի ընտրողների հետ հանդիպման ժամանակ ընտրողի կողմից հնչել է գրագետ ձևակերպված հարց Նաիրիտի վերականգնման շուրջ: Այդ մտածված հարցին վարչապետը տալիս է չմտածված իր պատասխանը, որը միայն ծաղրանքի է արժանի: Հերթական անգամ խոսում է ներդրողների կողմից իբրև թե չհաշվարկած և անշահավետ ներկայացված ծրագրերի շուրջ:

Կրկնենք ևս մեկ անգամ Կարեն Կարապետյանի անհեթեթ արդարացումներին մեր պատասխանը. EU-ASIA BFC հոլդինգը ներկայացրել է մի ծրագիր, որի համար կառավարությունը վճարել է ժամանակին չափազանց մեծ գումար անգլիական խոշորագույն JACOBS ընկերությանը:

Այդ ծրագրին մեր չկայացած վարչապետն այդպես էլ չի ծանոթացել: Հասկանում ենք նրա ժամանակի սղության պատճառը, որն առաջացել է իրեն չվերաբերվող նախընտրական շոուներին մասնակցելու հետևանքով: Սակայն կարծում ենք, որ արհեստավարժ և փորձառու ղեկավարը գոնե
կհանձնարարեր, որ մասնագետները իրեն հուշեն և օբյեկտիվորեն ներկայացնեն երկրի համար կենսական կարևոր այդ խնդրի մանրամասները: Իսկ իրականությունը հետևյալն է. եթե կա ներդրող, որը երկրից ոչինչ չուզենալով տալիս է հսկայական ներդրման առաջարկություն, ապա որպես առաջին քայլ, վարչապետը պարտավոր էր ներդրողի հետ քննարկել՝ կոնկրետ Նաիրիտի շուրջ նրա առաջարկները: Իրականում ներդրողի բազմաթիվ դիմումներին և առաջարկություններին վարչապետը պատասխանել է միայն տարբեր ոչ մասնագիտական ամբիոններից անհեթեթ հայտարարություններ անելով:

Տարբեր նախարարություններից ստացվել են գրավոր պատասխաններ, որոնք մեկը մյուսին հակասել են: Էներգետիկայի նախարարությունը հայտարարում է տենդեր, փաստաթղթերը հավաքվել են կարծես թե տնտեսական զարգացման նախարարությունում, հետո հայտարարվել է, որ մրցութային փաթեթը բացվելու է Նաիրիտի ղեկավարության կողմից, վերջինս հայտնել է, որ փաթեթը ուղարկված է Նաիրիտի սնանկության կառավարչին: Սա բավական է, որ մենք ևս մեկ անգամ բարձրաձայնենք, որ մեր վարչապետը ավելի շատ շոուների մասնագետ է, քան լուրջ
ղեկավար:

Մեր հոլդինգի անունից ևս մեկ անգամ հայտնում ենք. մենք պատրաստ ենք ներդրումային ծրագիրը քննարկելու այն պահին, երբ կստանանք հրավեր: Կրկնում ենք Նաիրիտը ազգային հարստություն է, ունի հսկայական միջազգային նշանակություն, և մեր հոլդինգը դեռևս չի կորցրել իր հետաքրքրությունը ու պահում է բացառիկ ակտիվություն Նաիրիտը վերաթողարկելու, արտադրվելիք հազարավոր տոննաներ ապրանքը լոգիստիկայով ապահովելու (նախատեսված են սեփական տրանսպորտային տեղափոխման հատուկ ծրագրեր), ինչպես նաև մարքեթինգ և
վաճառք միջազգային շուկայում իրականացնելու:

Ներդրողի հետ նման անհեթեթ հարաբերություններ վարելու պատճառը զուրկ է նորմալ բիզնեսի տրամաբանությունից և ունի մի պարզ պատճառ. ծածկել նախագահի և նախկին վարչապետի կողմից իրականացված հարյուրավոր միլիոնների կողոպուտը: Այլ պատճառ մենք չենք տեսնում:

EU-ASIA BFC հոլդինգի նախագահ
Աշոտ Գրիգորյան

24.03.2017

Բրատիսլավա, Սլովակիա