Զարյան 15 ա հասցեում՝ բնակիչների հետ կողք-կողքի, առնետներ են ապրում (լուսանկարներ)

Մինչ Արաբկիր վարչական շրջանի աշխատակիցներն ամպագոռգոռ հայտարարություններ են անում, թե տարածքում կատարվում են մաքրման ու բակային աշխատանքներ, կանաչապատվում են այգիներն ու պուրակները, փաստերն այլ բան են հուշում: Իհարկե, անկեղծ լինելու համար պետք է ասել, որ որոշ աշխատանքներ վարչական շրջանում կատարվել են, սակայն դրանք հիմնականում իրականացվել են կենտրոնական վայրերում և այնքան փոքր ծավալով, որ չարված աշխատանքներն իրենց մասին լռել չեն տալիս:

Այսպես օրինակ՝ Զարյան 15 ա շենքն ամբողջությամբ ու բակը վերածվել են, մեղմ ասած, աղբանոցի: Եթե նույնիսկ NEWSPRESS.am-ին չպատմեին, թե որքան վաղուց այստեղ բարեկարգման աշխատանքներ չեն կատարվել, ապա առանց այդ էլ ամեն ինչ ակնհայտ է:

Մի կողմից անբարեկարգ բակը, մյուս կողմից էլ ժամանակին չկատարվող աղբահանությունը, պատճառ են դարձել, որ շենքում իրենց մշտական բնակությունը հաստատեն նաև առնետները: Ու չնայած բնակիչների բազում բողոքներին՝ առայժմ նրանց ոչ ոք չի արձագանքում, և առնետները շարունակում են անարգել վխտալ շենքի պատերի տակ ու բազմանալ:

Անկեղծ լինելու համար պետք է ասել նաև, որ այս շենքի ճակատագիրը վարչական շրջանում կիսում են էլի շատ բնակելիներ, բայց չգիտես ինչու, թաղապետարանը, գոնե առայժմ, անհաղորդ է իրավիճակին:

Հարկ է նկատել նաև, որ վարչական շրջանի ղեկավարը հայտարարել է, թե «փորձել ենք մեր ուժերի ներածի չափով բարելավել համայնքը, կյանքի կոչել համայնքի համար կարևոր նշանակություն ունեցող ծրագրեր», նա նաև հայտարարել է. «Ես հպարտ եմ, որ մենք՝ արաբկիրցիներս, հարազատ ու սրտացավ ենք վերաբերում մեր համայնքին»:

Հետաքրքիր է՝ ի՞նչ կզգա այս հայտարարությունը տարածողը , երբ տեսնի իր իսկ համայնքի պատկերը ներկայացնող այս լուսանկարները:

zaqyan 3