Նախընտրական զավեշտ. Ընդդիմադիր «Ելքը» միանալո՞ւ է ընդդիմադիր «Ծառուկյանին»

«Ելք» դաշինքը միանալու է «Ծառուկյան դաշինքին» կամ էլ հավանականությունը մեծ է, որ միանալու է:

Իհարկե, այս միացումն առաջին հայացքից անհնար է, սակայն ոչինչ անհնար չէ, եթե նկատի ունենանք, որ և′ «Ծառուկյան», և′ «Ելք» դաշինքների կազմավորումն ամուր թելերով կապված է նախագահականի հետ: Ըստ երևույթին, նախագահականում որոշել են «ազնիվ, անկեղծ ընդդիմություն» ունենալ:

Ի դեպ` նաև կառավարվող:

Եթե որևէ քաղաքացի երբևէ չէր պատկերացնի Նիկոլ Փաշինյանին և Գագիկ Ծառուկյանին մեկ հարթակի վրա, այժմ կարող է պատկերացնել, կամ էլ կես քայլ է, որ այդ միասնությունն իրականություն դառնա:

Նախ կուսակցությունները եկել են այն եզրահանգման, որ հինգ-վեց հոգով կուսակցությունն ապագա ու ձայներ չունի, իսկ թեկուզ «չաղ ու բախտավոր», սակայն կարելի է համատեղել անհամատեղելին:

Ասում են, որ քաղաքականության մեջ մշտական թշնամիներ և բարեկամներ չկան, սակայն նման հանգուցալուծումն ավելի շատ հայկական իրականությանն է մոտ, քան այլ երկրների:

Ինչպե՞ս կարող է «ընդդիմադիր» համարվող Նիկոլ Փաշինյանը համագործակցել

մշտապես իշխանության մաս կազմող և իշխանության կամքով

տեղաշարժվող «Ծառուկյան դաշինքին»:

Եթե նման միավորումը հնարավոր է, պետք է, որ «Ելք» դաշինքը պարզապես խոստովանի, որ իշխանություն, թե ընդդիմություն միևնույնն է` «ես իշխանություն եմ ուզում՝ ցանկացած գնով», նաև «ես գեղեցիկ ընդդիմադիր պրոյեկտ եմ»:

Սա ավելի ազնիվ կլինի, և հանրությունը կգնահատի Ծառուկյանի հետ համագործակցությունը, քան ներկայացնի այն, ինչ չկա:

Ի դեպ, «Ծառուկյան»-«Ելք» համագործակցությունը ներկայացվում է իբրև հակադրություն

ՀՀԿ, ՀՅԴ և ՀՎԿ համագործակցության:

Այս պատկերը իրոք հուզիչ է` չորս կողմը «մերոնքականներ» են, և ընդդիմություն կդառնա լրիվ «մերոնքական», իսկ իշխանությունը մերոնք ու մերոնք են:

Այնպես որ՝ երկրում փոփոխությունները որևէ մեկին ձեռնտու չեն, այսպես գոնե մերոնքականներն իշխանություն ունեն, իսկ փոփոխությունների պարագայում` ձեռնունայն են մնալու, հատկապես՝ «ընդդիմությունը»:

NEWSPRESS.am