Դաշնակցությունը հաճոյանում է ՀՀԿ-ին

Բնապահպանության նախարար Արծվիկ Մինասյանը նախընտրական հանդիպումներից մեկի ժամանակ հիշատակել է, որ «Անկախությունից հետո 25 տարվա մեջ մեր երկրում դրական շարժեր չեն եղել»:

Նշենք, որ անկախության տարիների զգալի հատվածը Դաշնակցությունը կիսել է իշխանությունների հետ` ունենալով նախարարական պորտֆելներ, իսկ ինչո՞ւ դրական շարժեր հենց Դաշնակցություն չի կատարել.

դաշնակցական նախարարը լռել է:

Այսօր էլ Դաշնակցությունն այդ հնարավորությունն ունի, սակայն բացի տեղում դոփելուց, ինչպես հանրապետականները կամ «Բարգավաճը», ոչ մի այլ քայլ չի ձեռնարկում:

Դաշնակցությունը, լինելով հնագույն կուսակցություններից մեկը, անկախության շրջանում զբաղված էր գրեթե կուսակցական գործերով, ոչինչ ավելին:

Ի դեպ, Արծվիկ Մինասյանը հաղորդել է, որ հենց Դաշնակցության առաջարկով է Սերժ Սարգսյանը գնացել սահմանադրական փոփոխությունների`

անցում խորհրդարանական համակարգի:

Նշենք, որ սահմանադրական փոփոխությունները և անցումը խորհրդարանական կառավարման միանշանակորեն չեն ընդունվում, համակարգը փոխվելով չէ, որ իշխանությունն ավելի ճկուն և նպատակասլաց է դառնում. սա ուղղակի ավելի հմուտ ձև է իշխանությունը պահելու:

Արծվիկ Մինասյանը չի խորշում հայտնելուց, որ

դրա հեղինակը Դաշնակցությունն է:

Եթե Դաշնակցության խորհուրդներին Սերժ Սարգսյանն այդպես հետևում է, կուսակցությունը կարող էր երկրի կառավարման, ազատ-արդար-թափանցիկ ընտրությունների, սոցիալական քաղաքականության համար լավագույն լուծումներ և առաջարկներ տալ, ոչ թե իշխանության պահպանման համար` փոխել Սահմանադրությունը:

Եթե Դաշնակցությունը նման խորհուրդներ նախագահին չի տվել, ուստի չի ցանկացել, այն է` Դաշնակցությանը ո′չ անհրաժեշտ է սոցիալական հարցերի լուծում, ո′չ արդարության հաստատում, ո′չ էլ ազնիվ կառավարում, այլ, ինչպես ՀՀԿ-ն է ցանկանում, իշխանությունը պահել ամեն գնով:

Եվ դրա հեղինակը Դաշնակցությունն է:

Իսկ Դաշնակցության ինչի՞ն է պետք ՀՀԿ-ին նման առաջարկություն անելը, չի բացառվում, որ կուսակցությունում հասկացել են, որ դաշնակցական գործելաոճով իշխանության չեն հասնի:

Գոնե հաճոյանան Նախագահին:

Ինչ վերաբերում է նեղ տնտեսական շահի վրա տնտեսական մոդելի ստեղծմանը, ապա այնպես չէ, որ Դաշնակցությունը Հայաստանում բիզնեսներ չունի և այս կուսակցությունը չի առաջնորդվում սեփական շահերով` լինի անձնական, թե տնտեսական:

Կարող ենք ամփոփել, որ Դաշնակցությունը և ՀՀԿ-ն միմյանց շատ նման են, և դա է պատճառը, որ ժամանակ առ ժամանակ միմյանցից հեռանում են` միմյանց համակրելով:

Եվ լավ էլ լեզու են գտնում:

Բնապահպանության դաշնակցական նախարարը նաև հայտարարել է, որ բնությունը պետք է վերադարձնել հայ մարդուն, ընդերքը հասարակության սեփականությունն է, սա արդեն պոպուլիզմ է: Այնպես չէ, որ Դաշնակցության անդամները հանք կամ ՀԷԿ-եր չունենան: Պարզապես Դաշնակցությունն իշխանություններին հաճոյանում է` խոստանալով հետայսու ևս սիրել, հարգել և մեծարել ՀՀԿ-ին` թոզ փչելով հանրության աչքերին:

NEWSPRESS.am