Նաիրիտի շուրջ հերթական անմտածված և անհասկանալի գործընթացի վերաբերյալ ներդրող Հոլդինգի նախագահի արձագանքը

EU-Asia Business Finance Center Holding-ի 2016 թվականի դեկտեմբերի 24-ի ՀՀ տնտեսական զարգացման և ներդրումների նախարարությանն ուղղված նամակին 2017թ. փետրվարի 9-ին թվագրված ՀՀ տնտեսական զարգացման և ներդրումների նախարարի տեղակալ Տիգրան Խաչատրյանից ստացվել է պատասխան գրություն, որն ուղղակի հերթական անգամ ապացուցում է ՀՀ տնտեսական զարգացման և ներդրումների նախարարության անտեղյակությունը Նաիրիտի շուրջ հսկայածավալ ներդրումների կոնկրետ առաջարկության վերաբերյալ:

Պատասխանը երևի թե փորձ է հիասթափեցնելու պոտենցիալ ներդրողին, դրանով իսկ նրա հետագա քայլերի կատարման ցանկության սպառման համար պայմաններ ստեղծելու նպատակով: Դեռևս հոկտեմբեր ամսին ՀՀ կառավարության և վարչապետի հետ տեղի ունեցած հանդիպման ընթացքում EU-Asia Business Finance Center Holding-ի նախագահ Աշոտ Գրիգորյանը ներկայացրել է նախադեպը չունեցող ներդրումային ծրագիր՝ Նաիրիտի վերագործարկման և արտադրության հետագա կազմակերպման համար:

Իսկ ահա նամակում արծարծված միտքը «առաջարկի ուսումնասիրման և արդյունավետության գնահատման համար այնուամենայնիվ անհրաժեշտ է ներկայացնել ներդրումային ծրագիր՝ փուլերի մանրամասն նկարագրությամբ, ժամկետների, ֆինանսական հոսքերի, շուկայի ուսումնասիրության, ռիսկերի գնահատման և այլնի վերաբերյալ տեղեկատվությամբ» նմանվում է զավեշտի, քանի որ այլ բառով դժվար է բնորոշել նման «կարևորագույն» կետի առկայությունն ու ներկայացումը այն դեպքում, երբ ներկայացվել էր հսկայական ծրագիր և այն ևս մեկ անգամ ուղարկվել էր ՀՀ կառավարություն: Այսինքն այն ներկայացվել էր երկու անգամ՝ վերագործարկման փուլերի մանրամասն նկարագրությամբ, ժամկետների, ֆինանսական հոսքերի, շուկայի ուսումնասիրության, ռիսկերի գնահատման վերաբերյալ ամբողջական և սպառիչ տեղեկատվությամբ:

Բայց հանկարծ բոլորովին անհասկանալի և չափազանց արագացված տեմպերով սկսվում է Նաիրիտի սնանկության գործընթաց, և արդեն նոյեմբերի 28-ին դատարանի վճռով գործարանը ճանաչվում է սնանկ: Եվ սա այն դեպքում, երբ նույն ամսվա՝ նոյեմբերի 14-ին հայտարարվել էր մրցույթ (տենդեր), որն ընդամենը կրեց ձևական բնույթ՝ ի սկզբանե նախատեսված լինելով միայն ժամանակ շահելու նամար:

Իսկ դատարանի 2017թ. փետրվարի 17-ի որոշումներով արդեն սկսվել է Նաիրիտի լուծարման վարույթ և կասեցվել նրա գործունեությունը:

Այս ամենից հետո ցանկացած դիմում կամ գրություն ուղղված պետական պատկան մարմիններին, Նաիրիտի հետ կապված, վերահասցեագրվել է Նաիրիտի սնանկության գործով կառավարչին կամ դատարան: Իսկ վերջին նախադասությամբ ՀՀ տնտեսական զարգացման և ներդրումների նախարարությունը «խնդրում է», ներկայացնել ներդրումային ծրագիր առաջարկի ուսումնասիրման համար:

Սա արդեն զուրկ է որևէ բնորոշումից, քանի որ այն ոչ միայն իմաստազուրկ է, այլև իրենից ներկայացնում է ընդամենը երկրորդ պարբերության համառոտ նշում-կրկնություն: Փաստացի ստեղծվել է մի փակ շղթա, որի առկայությունը, հնարավորություն չի ընձեռում պոտենցիալ ներդրողին կատարելու Նաիրիտի վերագործարկման հետ կապված որևիցե քայլ: Ստեղծված իրավիճակը կրում է միտումնավոր բնույթ՝ նախատեսված փակելու բոլոր դռները ներդրողի առջև, հակառակ պարագայում կլիներ լիովին այլ իրավիճակ:

Ցավալի է, բայց փաստ, որ վերանվանված ՀՀ տնտեսական զարգացման և ներդրումների նախարարությունը շահագրգռված չէ ոչ միայն օտարերկրյա ներդրումների առկայությամբ և առաջարկությամբ, այլև ընդհանրապես Հայաստանի տնտեսական զարգացմամբ:

Նաիրիտի վերականգնման շուրջ վարվող պայքարը այսպիսով հասնում է իր գագաթնակետին: Բոլորի համար պարզ դարձավ, որ նոր վարչապետը ստացել է հանձնարարություն՝ նախկին կողոպուտները թաքցնելու համար ոչ մի պայմանների դեպքում Նաիրիտը չթողարկելու: ՀՀ տնտեսության զարգացմամբ հետաքրքրված բոլոր կուսակցությունները, կազմակերպությունները, հասարակական գործիչները և ժողովուրդը պարտավոր են ձայն բարձրացնել այս խայտառակ և աղաղակող գործընթացները կասեցնելու համար:

ԵՀՄՖ-ի նախագահություն
ԵՀՄՖ-ի մամլո քարտուղարություն
11.03.2017
Բրատիսլավա, Սլովակիա