Հանրապետականի բաղչան ջրողը…

«Հայկական վերածնունդ»՝ նախկին «Օրինաց երկիր» կուսակցությունում, խմորումներ են՝ ամեն տեսակ։ Մի կուսակցության անվանումից խմորվելը մյուսին՝ շատ բան չի փոխել կուսակցականների կյանքում և, սովորույթի ուժով, որքան էլ զարմանալի է, կուսակցությունը մասնակցում է 2017թ-ի ԱԺ ընտրություններին, հետաքրքիր է՝ ինչո՞ւ։ Չէ՞ որ նախորդ ընտրություններից հետո հանրությունը պարզ հասկացրեց, որ բան ու գործ գտեք ձեզ համար, ի՞նչ եք մեջ ընկել։

Որևէ նախընտրական խոստում չկատարեցին, ինչն էլ արեցին՝ կիսատ-պռատ։

Երկրում ավելի կարևոր գործեր կան, քան մշտապես

ՀՀԿ-ի բաղչան ջրելն ու պարարտացնելը։

Այդ գործը, երևի թե, ուրիշներն էլ կանեն՝ ավելի արժանապատիվ ձևով։ Հիմա էլ կուսակցության ներկայացուցիչ Հեղինե Բիշարյանը հայտարարել է, որ իշխանությունը վերցնելու է ապաշնորհ տղամարդկանց ձեռքից։

Ի դեպ, այս կուսակցությունում գենդերային խառնաշփոթ է, խոստացել են մինչև ընտրություններ հստակ սահմանազատել՝ տղամարդիկ մեկ կողմ, կանայք՝ հաջորդ կողմ։ Իսկ տղամարդկանց ցաքուցրիվ անելու մարամասները չի հաղորդել։

Տղամարդի′կ, եթե տեղյակ եք, թե ինչպես են կուսակցությունում անվանում Հեղինե Բիշարյանին՝ արժե զգուշանալ։

Ի դեպ, անդրադառնանք կուսակցության առաջնորդ Արթուր Բաղդասարյանին և նրա հայրենասիրական պոռթկումներին։ Գաղտնիք չէ՝ որ ուսանողներն անվճար են սովորում՝ բանակ չեն գնում, հետո ընդունվում են ասպիրանտուրա, հետո՝ չգիտեմինչ, որից հետո անցնում է 27 տարին, և նրանք բանակ չեն գնում։

Այս ձեռագիրը բավականին գործածական է:

Միայն վերջերս հայտնի դարձավ, որ աշխարհահռչակ քաղաքական գործիչ Արթուր Բաղդասարյանի որդին որոշել է սովորելով պաշտպանել հայրենիքը, իսկ այդ հայրենասիրական պոռթկումը մամուլը չի գնահատել։ Թեև Արթուր Բաղդասարյանը հայտարարել է, որ պայքարում է, որ աստիճանաբար Հայաստանում ստեղծվի պրոֆեսիոնալ բանակ, նա, իհարկե, իր որդուն նկատի չի ունեցել, ինչպես Հայաստանում շատ գործիչներ, ովքեր հայրենիք են բարբառում՝ բանակ չեն գնում, հայրենասիրություն են արտաշնչում, սակայն որդիները բանակում չեն ծառայում:

Հիմա էլ Արթուր Բաղդասարյանը։

Իհարկե, ազնիվ կլիներ, որ հայտարարեր, որ ինչպես մյուս պաշտոնյաների որդիները, այնպես էլ իմ որդին բանակում չի ծառայում՝ ասպիրանտուրայի, կամ չգիտեմինչի պատրվակով, փորձում է դասվել ժամանակակից գիտական մտքի գիգանտների շարքին։

Նա չի անհանգստանում, որ որդին չի ծառայել, այլ անհանգստանում է,

որ զբաղված են իրեն «սևփիառելով»։

Ինչ վերաբերում է նախընտրական խոստումներին կամ ծրագրերին, ապա Վերածնվածների կյանքում դարձյալ շատ բան չի փոխվել, այստեղ և′ առավոտներն են խաղաղ, և′ երեկոները։

Ինչպես նախկինում խոստանում էին ավանդների վերադարձ, այժմ էլ խոստանում են․ այս տարիների կուսակցությունն այլ նախընտրական դրույթ չկարողացավ մոգոնել, ինչպես ասում են՝ չեն ձգել ու վերադարձել են այնտեղ, որտեղից սկսել են։

Ա․ Բաղդասարյանը նաև նախընտրական խոստում է տվել՝

հույս, լույս, փոփոխություններ։

Եթե հույս, ապա սա մարդկությունն ունի առանց Արթուր Բաղդասարյանի, եթե ջերմություն դա էլ արևից ենք ստանում՝ Աստծո լույսը, և այստեղ էլ Վերածնված Հայաստանի միջամտության կարիքը չկա, իսկ ահա՝ փոփոխություններ, կարող էր չասել։

Ի՞նչն է ավելի շատ անհանգստացնում նախկին ՕԵԿ-ականներին՝

փոփոխությունը։

Երևի առանց մտածելու է ասել։ Պատկերացնո՞ւմ եք, եթե փոփոխություն լինի՝ ինչ է լինելու Վերածնված Հայաստանի հետ, ավելի լավ է՝ ոչ մի փոփոխություն։

Իմիջիայլոց, Արթուր Բաղդասարյանն առաջարկում է քվեարկել սրտով, մտքով, խղճով և ջիգյարով։

Բաղդասարյա′ն, լո՞ւրջ․․․

NEWSPRESS.am