Դաշնակցությունը ՀՀԿ-ին համեմատել է սատանայի հետ

Օրերս Դաշնակցության պատգամավորության թեկնածու Արթուր Ղազարյանը հայտարարել էր, որ «Հանուն պետականության, հայրենիքի, կարելի է նույնիսկ սատանայի հետ համագործակցել»։

Խեղճ Սիմոն Վրացյան, եթե իմանար՝ ներկա Դաշնակցության ներկայացուցիչներն իր հայրենասիրական մտքերն ինչպես են սեփականաշնորհելու և մեկնաբանելու, երևի թե չէր ասի։

Դաշնակցությունը հանուն Հայաստանի սիրուն՝ համագործակցում է ՀՀԿ-ի հետ։

Ապրիլի մեկն էլ չէ, որ ծիծաղենք ու անցնի, այս անեկդոտը Դաշնակցության համար է։

Իհարկե, Հայաստանի առաջին հանրապետության վարչապետն իր ժամանակին հանուն երկրի, անգամ թուրքերի հետ համագործակցեց, սակայն դա արվեց հանուն երկրի․ այդպիսին էին այդ պահին Դաշնակցության պատկերացումները երկրի անվտանգության և ժողովրդի ապահովության մասին։

Սակայն այս մղումը հարմարեցնել օրինակ ՀՀԿ-ին, որի հետ Դաշնակցությունը համագործակցել և համագործակցում է, ի դեպ, նաև համագործակցելու է, երևի թե ՀՀԿ-ականների համար միանշանակ չպետք է ընդունվեր։

Երևի չեն հասկացել․ Դաշնակցությունը ՀՀԿ-ին համեմատել սատանայի հետ․ պատկերացնո՞ւմ եք, եթե Արթուր Ղազարյանը սատանայի հարցն ավելի մասնավորեցներ։

Իհարկե, Դաշնակցությունը հանուն պետականության չէ համագործակցել ՀՀԿ-ի հետ, այլ իշխանության համար, նույնը նաև պետականության վերաբերյալ կարելի է նշել․ ի՞նչ էր եղել հայրենիքին և պետականությանը, որ այդքան անհրաժեշտ էր Դաշնակցության համագործակցությունն իշխող կուսակցության հետ:

Գրեթե ոչինչ։

Իշխանատենչությունը սքողել և ներկայացնել հայրենասիրություն՝ Դաշնակցության հերթական հայրենասիրական օյինբազություն է։

Հայտնի է, որ դաշնակցական գործիչները խոշոր բիզնեսներ ունեն թե′ արտերկրում, թե′ Հայաստանում, անշարժ գույք, ՀԷԿ-եր և այլն, այնպես որ՝ ի սեր շահի համագործակցում են իշխանությունների հետ:

Անունը դնում` հանուն հայրենիքի։

Թեկուզ այն, որ նախարարական պաշտոններում, երբ նշանակվել են Դաշնակցության ներկայացուցիչներ՝ գերատեսչությունը լցվել է տառաճանաչ դաշնակցականներով:

Անհայտ չէ, ի դեպ, նույնը կատարվում է նաև այսօր։ 

Եղբա′յրք դաշնակցականներ, իշխանություն սիրում եք՝ սիրեք, համեմունքներ ինչո՞ւ եք օգտագործում՝ սատանի ականջը խուլ։

NEWSPRESS.am