Քոռը քոռին ճանապարհ է ցույց տալիս

Օրերս ՀՀ երկրորդ նախագահ Ռոբերտ Քոչարյանը հայտարարություն էր տարածել՝ ՀՀ-ում ապրիլի 2-ի ԱԺ ընտրություններին ընդառաջ։

Հայտարարության մեջ նշվում է․ «Առաջիկա ընտրություններում, ակնհայտ է, որ լինելու է քսակների կռիվ՝ զոռբայության մթնոլորտում»։

ՀՀԿ մամուլի խոսնակ Էդուարդ Շարմազանովն, անդրադառնալով հայտարարությանը, նշել է. «Զոռբայության բոլոր դրսևորումները կամ մասսայական զոռբայությունն այլևս ՀՀ-ում անցյալում են»։

Նախ Քոչարյանի նման արտահայտությունը պատահական չէ․ էլ ո՞վ, եթե ոչ նա տեղյակ է, թե ինչպես են այս տարիներին տեղի ունեցել բոլոր ընտրությունները։

Ի դեպ, հաճախ է նշվում, որ ՀՀ-ում միակ արդար ընտրությունները տեղի են ունեցել 1991թ. և վերջ։

Այսքանով Քոչարյանը ճիշտ է, ճիշտ է մասամբ նաև Շարմազանովը, ով ասել է, որ զոռբայությունն անցյալում է։

Եթե նախկինում, իրոք, զոռբայությունն ավելի մեծ դերակատարում ուներ, ապա այժմ ավելի մեծ դերակատարում ունեն փողը և վարչական ռեսուրսները։ Եթե նախկինում զոռբայություն էին անում ընտրողների շրջանում, այժմ զոռբայություն են անում ՀՀԿ-ականները:

 Կարճ ասած՝ ՀՀԿ-ում կռիվ է ընկել։

Եթե նախկինում ընտրությունները «սարքել» կարող էին բոլոր օղակներում, այժմ փոքր-ինչ դժվար է․ հիմնական գործարքները կնքվում են մինչև ընտրատեղամաս հասնելը՝ ընտրակաշառքի և մեծ ու փոքր պաշտոնյաների միջոցով, նաև թաղային և ավելի մեծամասշտաբ հեղինակությունների ձեռամբ։

Ի դեպ, Շարմազանովն ակնարկել էր, որ իշխանության և ընդդիմությանն միասնական գործունեությունը զոռբայության մեջ դերակատարում ունեն. հասկացրել է, որ նախկինում իշխանություն և ընդդիմություն ասվածը գոյություն չուներ:

Խեղճ Շարմազանովը, իրեն թվում է, թե որևէ բան է փոխվել այդ ժամանակներից։

Գարնան գալն այնքան կտրուկ էր, որ Շարմազանովին թվում է, թե գարնան ձնհալը ենթադրում է, որ ՀՀԿ-ում էլ է ձնհալ, սակայն նույն, մշտենջենական սառույցն է։

Ի դեպ, Ռ․ Քոչարյանը նաև ճիշտ է, որ ընտրություններում գաղափարական պայքար չկա․ եթե նայենք առաջադրված թեկնածուներին՝ խոսել գաղափարի մասին, անգամ՝ մտածել, ուղղակի զավեշտալի կլինի, սակայն կա մեկ բայց․ երբեք գաղափարախոսությունը որևէ դեր չի խաղացել ընտրություններում։

Այս մասին ևս Քոչարյանը տեղյակ է։

Այնպես, որ Քոչարյանից հետո շատ բան չի փոխվել, երևի մեկ քայլ առաջ են գնացել՝ սահմանադրական փոփոխությունները: Չի բացառվում, որ հենց դա դուր չի եկել Քոչարյանին:

 ՀՀԿ-ն փոխել է, հարմարացրել է իրեն Սահմանադրությունը, իսկ Քոչարյանը՝ ոչ։

Ե′վ Ռոբերտ Քոչարյանն է ճշմարտություն ասում, և′ Էդուարդ Շարմազանովը, ուղղակի զոռբայություն է, և սրանից ո′չ երկիրն է շահում, ո′չ ժողովուրդը։

NEWSPRESS.am