«Տո ես Նշանի թոշակը կտրողի մերը…». Հաշմանդամ զինվորին կարգ տալու համար գումար են պահանջել (ֆոտո)

Պաշտպանության նախարարությունն առանց հիմնավորելու կտրել է ժամկետային զինծառայության ընթացքում հաշմանդամություն ստացած Նշան Բարսեղյանի թոշակը: Այս մասին NEWSPRESS.am-ին ահազանգեց Նշանի քույրը:

Նշան Բարսեղյանն Արարատի մարզի Դաշտակերտ գյուղից է: Իր ծառայության ընթացքում՝ 2015 թ. նա ուղեղի ցնցում է ստացել և ոտքից վիրավորվել, բացի այդ, նրա մարմնի մեջ պայթյունի բեկորներ են մնացել: Բուժստուգման արդյունքում նրան հաշմանդամության 3-րդ կարգ են տվել և նշանակել թոշակ: Վիրավորված ոտքը Նշանին թույլ չի տալիս քայլել առանց ձեռնափայտի, բացի այդ, նա նաև ունի խնդիրներ՝ կապված նյարդային համակարգի հետ, ինչի հետևանքով էլ չի կարողանում աշխատել և գոյատևում է իր ստացած թոշակով:

Սակայն, արի ու տես, որ այդ մի քանի հազար դրամն էլ Պաշտպանության նախարարությունը շատ է համարել: 3 ամիս առաջ Նշանին կտրել են թոշակից:

Պատահածից նյարդայնացած Նշանն այդ մասին դժվարացավ մեզ հետ խոսել, անընդհատ բարկանում էր, սակայն մեզ հետ զրույցում նրա քույրն ամեն ինչ պատմեց:

Բանն այն է, որ նախնական բուժստուգումների արդյունքները ցույց են տվել, որ Նշանը կարող է ստանալ հաշմանդամության երկրորդ կարգ, որից էլ հետևաբար կավելանա նրա թոշակի չափը: Սակայն անցած երկու տարվա ընթացքում, կարգը փոխելու համար բուժզննում անցնելիս՝ ստուգող հանձնաժողովը նրան ակնարկել է կաշառք տալ: Իսկ երբ ամեն անգամ Նշանը մերժել է՝ նշելով, որ ինքն անօրինական ոչինչ չի անում և պահանջում է օրենքով իրեն հասանելիքը, նրան պատասխանել են, թե «քեզ ի՞նչ ա եղել որ, առողջ տղա ես, գնա, աշխատի…»:

Երեք ամիս առաջ էլ Նշանը, վերջին բուժստուգումից հետո, վերջնականապես կտրվել է թոշակից:

«Նշանին կանչել են Մուրացանի հոսպիտալ և ասել են, որ քեզ այլևս թոշակ չենք տալու, հետո ասել են՝ նստի, բացատրենք, որ հանկարծ չգնաս՝ բողոքես: Այդպես են ասել, քանի որ նախորդ տարի ևս բողոքարկեցինք, հիմա պատմությունը կրկնվում է»,- դեպքի մանրամասներն է ներկայացնում նրա քույրը:

Նրա խոսքով՝ նորությունն իմանալով, եղբայրն այլևս ոչ մի բացատրություն չի լսել, ու քանի որ նա ուղեղի ցնցում ստացած է և ունի նյարդային համակարգի որոշ խնդիրներ, առավել ևս այդ օրը հանգստացնող դեղահաբեր ընդունած չի եղել, ուստի այդ պահին չի կարողացել իրեն տիրապետել և ագրեսիվ է դրսևորել իրեն:

Խնդրով մտահոգ հայրն ու քույրը դիմել են համայնքի ղեկավար Նորիկ Մալխասյանին, ում միջնորդությամբ փորձել են հարցը ներկայացնել մարզպետ Արամայիս Գրիգորյանին և Պաշտպանության նախարար Վիգեն Սարգսյանին:

NEWSPRESS.am-ի հետ զրույցում Նորիկ Մալխասյանն իր հերթին նկատեց, որ հարցը բարձրացված է, և ինքը շատ կցանկանար, որ դրան լուծում տրվեր:

«Տո ես Նշանի թոշակը կտրողի մերը….,- մեզ հետ զրույցում էմոցիաները չէր կարողանում պահել համայնքի ղեկավարը:- Եթե կարող եք՝ օգնենք Նշանին: Ես չգիտեմ՝ ինչ կարող եմ անել: Եթե իմանամ, որ մի ապտակ կտամ էդ կտրողին, ու դա կօգնի՝ կտամ, բայց իմ ձեռքին ոչինչ չկա»,- ասաց գյուղապետը:

Նշանը թերևս միակ մարդը չէ, ով տուժում է Պաշտպանության նախարարությունում տիրող կոռուպցիոն երևույթներից: Զինվորներին համապատասխան բուժսպասարկում ցույց տալու փոխարեն, զինվորական հոսպիտալն զբաղված է փողեր վերցնելով:

Փաստորեն այն, ինչ հասնում է Նշանին օրենքով, ցանկանում են կաշառքի դիմաց տալ: Իսկ եթե նույնիսկ չի հասնում, ապա դա ավելի վատ է, քանի որ կաշառքով կարող են տալ այն, ինչ օրենքով չի թույլատրվում:

Իսկ ամենացավալին այն է, որ կուռուպցիան քայքայել է ոլորտը մինչև իսկ այնքան, որ փրկելու հույսի նշույլ անգամ չի երևում: