Դատական ծառայողների անփութության հետևանքով կրում եմ մեծ նյութական ծախսեր. NEWSPRESS.am-ի հիմնադիրը դիմում է Կենտրոնի դատարանի աշխատակազմի ղեկավարին

IPI (Միջազգային Մեդիա Ինստիտուտ) լրատվական կազմակերպության խորհրդի անդամ, NEWSPRESS.am կայքի հիմնադիր-տնօրեն Արիանա (Արմենուհի) Հովսեփյանը դիմում է ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի աշխատակազմի ղեկավարին:

«Հայտնում եմ, որ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի /նախ.դատ. Մ.Մակյան/ կողմից թիվ ԵԿԴ/0092/01/16 քրեական գործով 13.12.2016 թ. կայացվել է դատավճիռ, որի վերաբերյալ վերաքննիչ բողոք է ներկայացվել ՀՀ վերաքննիչ քրեական դատարանին:

Ըստ «Դատալեքս» դատական տեղեկատվական համակարգի ՝ սույն գործով Մ.Շուշանյանի և Ա.Հովսեփյանի նույնականացման քարտերը՝ մեկ ծրարում, 13200614 քրեական գործի և ԵԿԴ/0061/01/15 քրեական գործը մեկ փաթեթում քրեական գործի հետ հանձնվել է դատավորին:

Ես պաշտոնապես հանդիսանում եմ միջազգային հեղինակավոր IPI /Միջազգային մեդիա ինստիտուտ/ և SEEMO լրատվական կազմակերպությունների խորհրդի անդամ, նաև Newspress.am լրատվական կայքի հիմնադիր-տնօրեն և գործունեությունս իրականացնելու համար կրում եմ որոշակի հարկային և այլ պարտականություններ:

Հեռախոսային կապի միջոցով դիմել եմ դատարանին՝ խնդրելով տրամադրել նույնականացման քարտս, նշելով դրա անհրաժեշտության և լրջության հարցը, սակայն դատարանի աշխատակազմի կողմից ամեն անգամ ստացել եմ աբսուրդի հասնող բացասական պատասխան, որ «նույնականացման քարտը մեզ մոտ չէ դիմեք նախաքննության մարմնին»:

Հետագայում դիմում եմ ներկայացրել նաև ՀՀ վերաքննիչ քրեական դատարանին, որը պատասխանել է, որ քրեական գործն ուղարկվել է ՀՀ վերաքննիչ քրեական դատարան՝ առանց կից փաթեթների, ինչն անթույլատրելի է:

Ավելին՝ դիմել եմ նաև ՀՀ Գլխավոր դատախազություն, որտեղից ինձ հայտնել, որ նույնականացման քարտս գտնվում է Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում:

Նման աշխատելաոճը տեղիք է տալիս մտածելու, որ դատարանի աշխատակազմի աշխատակիցները չեն տիրապետում, թե կոնկրետ գործով ինչ փաստաթղթեր և ապացույցներ են կցված տվյալ գործին, չեն տիրապետում պաշտոնի անձնագրով նախատեսված իրենց իրավունքներին ու պարտականություններին, այսինքն՝ չեն համապատասխանում իրենց զբաղեցրած պաշտոնին:

Հաշվի առնելով, որ դատական ծառայողներն անմիջականորեն ենթարկվում են դատարանի աշխատակազմի ղեկավարին՝ դիմում եմ Ձեզ, որպեսզի միջոցներ ձեռնարկեք աշխատակազմի աշխատանքը հանրության շահերին չհակասող միջոցով իրականացնելու, ինչպես նաև խնդրում եմ հանձնարարել դատարանի համապատասխան աշխատակցին՝ ինձ տրամադրել նույնականացման քարտս:

Սույն դիմումով Ձեզ իրազեկում եմ նաև, որ նշածս դատական ծառայողների անբարեխիղճ, ոչ պատշաճ և անփույթ աշխատանքի հետևանքով կրում եմ մեծ նյութական /ֆինանսական ծախսեր/, քանի որ հանդիսանալով իրավաբանական անձ՝ զրկված եմ կատարելու ստանձնածս պարտավորությունները հանդեպ հարկային մարմինների, ինչպես նաև որպես աշխատատու՝ զրկված եմ վճարելու աշխատավարձերը, որպիսի պայմաններում կրածս վնասների փոխհատուցումը պահանջելու եմ այն առաջացրած մարմնից /Դատարան, դատական դեպարտամենտ/ ՀՀ օրենսդրությամբ սահմանված կարգով»: