«Հրապարակ». ՀՀԿ-ին դեմ եմ՝ վարչապետին եմ ընտրելու

«Հրապարակ» օրաթերթը գրում է.

«Նախընտրական այս փուլում ամենահետաքրքիրը մարդկանց՝ ընտրողների երկխոսություններն են՝ «ում ես ընտրելու, ինչու» թեմայով։ Երեկ ակամայից նման մի ուշագրավ երկխոսության ականջալուր եղա։ Փորձեմ ներկայացնել՝ հնարավորինս առանց խմբագրման։ Ո՞ւմ ես ընտրելու, հարցնում է միջին տարիքի տղամարդը միջին ֆիրմայի տիրոջը։ «Վարչապետին»։ «Էնա ասա՝ ՀՀԿ-ին, էլ ի՞նչ վարչապետ»։ «Չէ, ապեր, ես ՀՀԿ-ին դեմ եմ»։ «Լսիր, գրագետ մարդ ես, չե՞ս հասկանում, որ քո վարչապետը ՀՀԿ-ի ներկայացուցիչն է, ընտրել վարչապետին՝ կնշանակի ընտրել ՀՀԿ-ին»։ «Չէ, բայց ինքը նորմալ մարդ է, ՀՀԿ-ական չէ»։ «Ո՞նց ՀՀԿ-ական չէ՝ ՀՀԿ փոխնախագահն է և ՀՀԿ-ին է քարոզում, իր 6-րդ քվեաթերթիկը հենց ՀՀԿ-ն է՝ իշխող կուսակցությունը․․․ եթե ավելի պարզ ասեմ՝ Սերժ Սարգսյանը»։ «Դե հիմա ես էդ մարդուն հավատում եմ, ինքը կարող է փոխել մեր երկիրը»։ «Փոխում է-չի փոխում՝ չգիտեմ, բայց որ ինքը ՀՀԿ-ի դեմքն է, ՀՀԿ-ի օգտին է քարոզում, էդ պետք է հասկանաս։ Ասենք՝ գիտե՞ս, որ իր անունը նույնիսկ չկա նախընտրական ցանկում»։ Դիմացինն այս փաստարկների ազդեցության տակ աչքիս առաջ խեղճանում է։

Ակնհայտ է, որ հակափաստարկներ չի գտնում, բայց նաև հաստատակամ է իր որոշման մեջ՝ «վարչապետին է ձայն տալու»։ Լսում եմ այս երկխոսությունն ու հասկանում, որ ՀՀԿ-ի հաշվարկն անվրեպ է։ Ոչ միայն ռեյտինգային կոչվող այլանդակությունը ներմուծեց մեր կյանք, որի «պտուղները» մենք ապրիլի 3-ին լիուլի կվայելենք, այլև «հանճարեղ» քայլ արեց՝ չվարկաբեկված անձի ներգրավելով իր նախընտրական քարոզչության մեջ։ Այս պարագայում նրա հաշվարկն ու ակնկալիքը միանգամայն արդարացված են։ Մնում է, որ Կարեն Կարապետյանի հաշվարկներն ու ակնկալիքներն էլ արդարանան, և նա տարիներ անց չզղջա այս քայլն անելու համար»։

Մանրամասները` թերթի այսօրվա համարում