Արոն երբեք վարկաբեկված չի եղել. պայծառատես Անի Գրիգորյանը «Ճվճվ Արոյի» և նրա որդու մասին

«Ճվճվ Արո» մականվամբ Արա Վարդանյանի 25-ամյա որդու՝ Սարգիս Վարդանյանի նկատմամբ հարուցվել է քրգործ։ Մամուլում շրջանառվող լուրերի համաձայն՝ օրերս՝ ուշ երեկոյան, Ծաղկաձորի «Կոսմոս» խաղատանը կրակոցներ են հնչել: Դրա հետևանքով Սարգիսը ձախ ոտքի շրջանում ստանում է հրազենային վնասվածք։ Նրա մոտ հայտնաբերվել է «Վալտեր» տեսակի ատրճանակ:

Պայծառատես Անի Գրիգորյանը, ով միաժամանակ նաև Վարդանյանների հարազատն է, չցանկանալով վիրավորել ոչ ոքի՝ այնուամենայնիվ, նկատում է, որ այս տեղեկատվությունը ոչ միայն ճիշտ չէ ներկայացված, այլև օգտագործվել են ոչ պատշաճ որակումներ:

Նա NEWSPRESS.am-ի հետ զրույցում նախ նկատեց, որ Սարգիսը ոչ ոքի վրա չի կրակել: Նրա խոսքով՝ դիպվածն իսկապես պատահականություն է: Ըստ Անի Գրիգորյանի՝ ավելի լավ է ոչինչ չգրել, քան դեպքի մասին բարձրաձայնել ու աղաղակել սխալ տեղեկատվությամբ:

Նա նկատում է՝ եթե մարդիկ ֆինանսապես կայացած են, չի նշանակում, թե նրանք վատ մարդ են կամ նրանց քայլերը կարելի է սխալ ու վատ ձևով ներկայացնել:

«Ինչքան անարժան մարդիկ կարգ էլ են խախտում, կազինո էլ մտնում, բայց նրանց մասին չեն գրում այդքան, փակում են, անցնում է: Իսկ այս տղաները, որ նորմալ ընտանիքի զավակներ են անընդհատ ուշադրության կենտրոնում են, ու նրանց մասին անընդհատ վատ հրապարակումներ են լինում…»,- նկատում է Անի Գրիգորյանը:

Դա մի կողմից, մյուս կողմից էլ պայծառատեսը նշում է, որ նյութի մեջ գրառել են, թե «Ճվճվ Արո» մականվամբ Արա Վարդանյանը հանցագործ աշխարհում վարկաբեկված է:

«Նման բառը, որ կպցրել են Արոյին, էդ կպցնողը կարո՞ղ է ասել, թե Արոն էդ ինչո՞ւ է վարկաբեկված: Ինչի՞ Արոն համասեռամոլ է, որ վարկաբեկված է. համասեռամոլներն են վարկաբեկված, ամենավերջին ստոր մարդիկ են վարկաբեկված… մարդ, որ մի բան գրում է, պետք է կարողանա բացատրել, թե ինչու է այդպես գրել… չի կարելի, չէ՞: Արոյին պետք է ճանաչեն, որ նրա մասին նման բան գրեն… Արոն երբեք վարկաբեկված չի եղել…»,- ասում է Անի Գրիգորյանը:

Նրա խոսքով՝ Արա Վարդանյանն ունի այնպիսի դրական հատկանիշներ, պատիվ, հարգանք, որից շատերը զրկված են: Անի Գրիգորյանը հպարտությամբ է հայտարարում. «Այո՛, ես այդ տղաների քույրն եմ…»: