Կոռուպցիան ծաղկում է՝ ընկել են, Չախչախ են խաղացնում. մեկի պոչը մյուսի ոտքի տակ է

Կառավարությունում Արդարադատության նախարար Արփինե Հովհաննիսյանը, Հայաստանի քննչական կոմիտեի ղեկավար, նախկին գլխավոր դատախազ Աղվան Հովսեփյանը, նաև Արդարադատության նախկին նախարար Դավիթ Հարությունյանը հետաքրքիր բանավեճ են ունեցել «Դատախազության մասին» ՀՀ օրենքում լրացումների շուրջ քննարկումների ժամանակ։

Արդարադատության նախարարությունն առաջարկում է, որ ՀՀ գլխավոր դատախազությունը յուրաքանչյուր տարի՝ մինչև ապրիլի 1-ը, հրապարակի հանցագործությունների քննության վերաբերյալ հաղորդում ՀՀ գլխավոր դատախազության կայքէջում: Ընդ որում՝ կոռուպցիոն հանցագործությունների քննության արդյունքների վերաբերյալ տեղեկությունները ներկայացվում են առանձին:

Ըստ քննչական ենթակայության՝ հաղորդումը պետք է պարունակի տեղեկություններ նախորդ տարվա ընթացքում կատարված հանցագործությունների քննության արդյունքների վերաբերյալ, մասնավորապես՝ կոռուպցիայի: Նախաքննական մարմինները օրենսդրորեն պարտավորվում են դատախազությանը ներկայացնել հանցագործությունների քննման վերաբերյալ տվյալներ։

Ակնհայտ է, որ իրավական ոլորտում մի կողմից դատախազությունն ու քննչական կոմիտեն, մյուս կողմից արդարադատության նախկին և ներկա նախարարները տարաձայնություններ ունեն:

Եթե Աղվան Հովսեփյանը հայտարարում է, որ փոփոխությունները հակասահամանադրական են և այն կարգավորվում է կառավարության որոշմամբ՝ երևի մի բան գիտի, իսկ այն, որ փոփոխությունները քննարկվել են հակակոռուպցիոն խորհրդում՝ դեռ ոչինչ չի նշանակում։

Իսկ Արփինե Հովհաննիսյանը հայտարարել է, որ կառավարության որոշումով կարգավորելը կլինի հակասահմանդրական:

Հիշեցնենք, որ հակակոռուպցիոն խորհուրդը գործում է դեռևս 2004թ-ից և այդ ընթացքում կոռուպցիան ուղղակի ծաղկել է։

Ավելի գործնական լինելու համար ԱՄՆ դեսպան Ռիչարդ Միլզը երկու առաջարկություն է արել՝ հակակոռուպցիոն քննություն սկսել ո՛չ միայն կաշառքի ստացման դեպքում, այլ եթե պաշտոնյայի հայտարարագրած ակտիվները գնահատելիս դրանց մեծությունը ողջամիտ կասկածներ առաջացնի, նաև քննության առնել ամբողջովին անկախ հակակոռուպցիոն մարմնի ստեղծումը: Մարմին, որը կունենա քննություն ու քրեական հետապնդում իրականացնելու իրավասություն։

Կարճ ու կոնկրետ։

Ի դեպ, ԱՄՆ ՄԶԳ-ն պետք է 750 հազար դոլար տրամադրեր, սակայն, ինչպես երևում է՝ չի տրամադրելու՝ խորհրդի անբովանդակ աշխատանքի պատճառով։ Այսինքն՝ հայրենի իրավապահ համակարգը կոնկրետ չի պայքարում կոռուպցիայի դեմ, սակայն ոլորտում իրենք իսկ ունեն խնդիրներ։

Չմոռանանք, որ շրջանը նախընտրական է, նաև հավանական է, որ իշխանությունները ցանկանում են տեղեկանալ, թե ի՞նչ է կատարվում դատախազությունում, նախաքննական մարմիններում և դրա համար օգտագործում են Արփինե Հովհաննիսյանին։ Չի բացառվում նաև, որ պարզապես նախընտրական «քցոցի է»։

Ի դեպ, կոռուպցիայի առումով դժվար է միմյանց մեղադրանքներ ներկայացնելը, ինչպես ասում են՝ մեկի պոչը մյուսի ոտի տակ է և դա փորձում են անել օրենքի անվան տակ, կասկածի տակ դնելով՝ սահմանադրակա՞ն է, թե՞ ոչ։

Ի դեպ իրավական համակարգի մասին:

Սա այն ոլորտն է, որից գրեթե բոլորը դժգոհ են և հենց իրավական համակարգում է կոռուպցիան բարգավաճում։ Իհարկե, սա կարող ենք ընդհանրական ներկայացնել, քանի որ կոռուպցիայի մասին բացահայտ խոսել՝ ոչ ոք չի հանդգնում: Հայաստանում արդարադատ որևէ իրավական պաշտոնյա որպես կատեգորիա, գոյություն չունի։

Գլխին սարքել, քննությունը տանել այլ ուղղությամբ, ապացույցները կորցնել կամ թաքցնել, սպանությունը կոծկել, մարդասպանին արդարացնել և այլն, և այլն։ Իհարկե այս ամենը թողած՝ դատախազությունից պահանջում են հրապարակեք տվյալները:

է՛հ, որ հրապարակեն՝ ի՞նչ…

NEWSPRESS.am