Ռինգ են դուրս գալիս «ուժեղ տղերքը»

Խորհրդարանական ընտրությունները դառնում են ոչ թե քաղաքական ուժերի ընտրապայքար` ԱԺ մտնելու համար, այլ պայքար` հանուն ինքնապահպանման ու վերարտադրման, կամ ինչպես ասում են՝ գործում է ջունգլիների օրենքը, այսինքն՝ կհաղթի նա, ով ավելի ուժեղ է:

Թերևս խորհրդարանական ընտրություններում մասնակցության հայտ ներկայացրած ուժերն այս օրենքը հասկացել են բառացիորեն: Այսինքն՝ ինչ-որ տեղ ու ինչ-որ չափով վարկանիշ ունեցող թեկնածուները պայքարում են՝ ոչ թե օգտագործելով իրենց բարի համբավը (եթե իրոք այն բարի է) որպես ուժ, այլ ուժն են օգտագործում՝ «համբավի» տեր դառնալու համար: Ընդ որում, համբավ՝ աթոռի կամ մանդատի տեսքով:

Ու ստացվում է, որ ով ում հասցնում «շանսատակ» է անում…

Բայց ամենացավալին այն է, որ իրար քեն քշող, իրար «սատկացնող» ու իրար կոկորդ կրծող այդ «լավ տղերքը» վաղն արդեն Ազգային ժողովում մեր ազգի ճակատագիրն են որոշելու:

Մյուս կողմից էլ այլ բան չէր էլ կարելի սպասել, հատկապես ռեյտինգային ցուցակներով առաջադրված թեկնածուներից: Նրանց վիճաբանություններն ու նույնիսկ հնարավոր թշնամանքը միմյանց նկատմամբ՝ կանխատեսված էր, բայց շատ քչերը կհավատային, որ նրանք պատրաստ են իրար «փոր ճղել»՝ մինչև իսկ հասնելով «խմբակային հարձակումների»:

Արարատի մարզում ՀՀԿ ռեյտինգային ցուցակով առաջադրված պատգամավորներ Արայիկ Գրիգորյանի (Ավշարի Արո) և Մուրադ Մուրադյանի մենամարտից ոգևորված՝ ՀՀԿ ռեյտինգային ցուցակով առաջադրված թեկնածու Բազմասեր Առաքելյանը ևս ռինգ դուրս եկավ՝ մարտադաշտի վերածելով նաև Արագածոտնի մարզը:

Իր անվանը համահունչ գործելաոճով, բազմասեր այս մարդը, մի ժամանակ սիրում էր ԲՀԿ-ն, հետո այնպես սիրեց խորհրդարանն ու իր մանդատը, որ հանուն դրա՝ սիրեց նաև ՀՀԿ-ն ու դարձավ քրեածին արկածների սիրահար: Ու հիմա հանուն այդ «բազմասիրության»՝ նա ծեծուջարդ է նախաձեռնել Արագածոտնում:

Սկզբում ծեծկռտուք եղավ Բազմասեր Առաքելյանի և նույն տարածքում առաջադրված՝ «Ծառուկյան» դաշինքի թեկնածուի աջակիցների միջև։ Հետո նա իր հայրենի Փարպի գյուղում, իր հարազատ «օջախ» հրավիրեց հերթական «զոհին»՝ այս անգամ դաշնակցական համագյուղացուն ու ստորաբար նրան ենթարկեց խմբակային ծեծի: Պատգամավորներն ու նրա կողմնակիցները նաև հարձակվել են տուժածի եղբոր վրա։

Խոսում են, թե «Բազմասերը ծեծի կարոտ է», ու դաշնակցականները պատրաստվում են Բազմասերին «ծեծի կարոտ չթողնել»: Ասում են՝ նրանք վրեժխնդիր են ուզում լինել: Ասում են նաև, որ միջադեպի հետ կապված արդեն իսկ նյութեր են պատրաստվում, բայց փաստը մնում է այն, որ, այսպես կոչված, կասկածյալը անձեռնմխելի է ու, եթե նման բազմասեր ոճով շարունակի՝ առաջիկայում ևս կշարունակի մնալ «անձեռնմխելի» ու անպատիժ:

Արմինե Մկրտումյան