«Ժողովուրդ». Լևոն Յոլյանը չի կարողանալու երկար վայելել ՎՊ նախագահի պաշտոնը

«Ժողովուրդ» թերթը գրում է.

«Սերժ Սարգսյանը ՀՀ վերահսկիչ պալատի նախագահի թափուր պաշտոնի համար ԱԺ է ներկայացրել Լևոն Յոլյանի թեկնածությունը: Նկատենք, որ Լևոն Յոլյանն այս ոլորտում նոր մարդ չէ. նա 9 տարի շարունակ զբաղեցրել է ՀՀ վերահսկիչ պալատի նախագահի տեղակալի պաշտոնը, 2016թ. փետրվարին նշանակվեց ՀՀ էներգետիկայի և բնական պաշարների նախարար: Սակայն կառավարության փոփոխությունից հետո վարչապետ Կարեն Կարապետյանը չցանկացավ նրա հետ աշխատել:

Այնպես ստացվեց, որ ԱԺ այս ընտրություններից առաջ Իշխան Զաքարյանը հրաժարական տվեց ՎՊ նախագահի պաշտոնից՝ հայտարարելով կրկին քաղաքականությամբ զբաղվելու և «Ծառուկյան» դաշինքի շտաբը գլխավորելու մասին: Ու հիմա Սերժ Սարգսյանը Լևոն Յոլյանին է առաջադրել այդ թափուր պաշտոնում:

Նկատենք, որ Յոլյանը միշտ ձգտել է դառնալ ՎՊ նախագահ, տարիներ շարունակ լինելով Իշխան Զաքարյանի տեղակալը՝ նրա թիկունքում անթաքույց պայքարել է այդ պաշտոնի համար: Ու հիմա կատարվել է նրա երազանքը: Բայց ամեն ինչ առաջվա նման չէ:

2018թ. ապրիլից ամբողջությամբ ուժի մեջ կմտնի նոր Սահմանադրությունը, ըստ որի՝ վերահսկիչ պալատը վերածվելու է հաշվեքննիչ պալատի, և այդ մարմնի ղեկավարը լինելու է անկուսակցական, ավելին՝ այդ կառույցը զրկված է լինելու իր այսօրվա լայն գործառույթներից: Իսկ Յոլյանը, թեև դե յուրե անկուսակցական է, սակայն առավել քան սերտաճած է ՀՀԿ-ի հետ: 2013թ. նախագահական ընտրություններում նա Սերժ Սարգսյանի շտաբի պետի տեղակալներից մեկն էր: Այսինքն` Յոլյանը չի կարողանալու երկար վայելել ՎՊ նախագահի պաշտոնը. ապրիլից հետո շատ բան կփոխվի:

Ինչ վերաբերում է պալատի գործունեությանը, ապա Իշխան Զաքարյանի օրոք վերջին մեկ տարում այն գրեթե ոչինչ չէր «վերահսկում»:

Մանրամասները՝ թերթի այսօրվա համարում