Շարմազանովը հավատում է ուրվականներին

Ազգային ժողովի փոխխոսնակ Էդուարդ Շարմազանովը լսել է ականջի ծայրով, որ ընտրակաշառք են բաժանում։ Իհարկե, լինելով երդվյալ ՀՀԿ-ական՝ նա կյանքի սրբազնագույն պարտքն է համարում փնտրել-գտնել և պատժել մեղսագործներին։

Հիշեցնենք, որ նա հայտարարել էր, որ կոնկրետ փաստեր չունի ընտրակաշառք բաժանելու վերաբերյալ, սակայն «եթե քաղաքացին բողոք չունի, որ ընտրակաշառք է վերցրել՝ չես կարող հաստատել», իհարկե, նա կարող է հակառակն ասել՝ եթե քաղաքացին բողոք ունի, կարող ես հաստատել։

Կաշառքի մեղադրանքի համար նրան պետք է գեթ մեկ քաղաքացի, ով կարող է խոստովանել, որ ընտրակաշառք է վերցրել և եթե այդ մեկ քաղաքացուն գտնի, ապա կաշառք վերցրած քաղաքացու համար շատ վատ է լինելու, նա կաշառք վերցնելու համար կհայտնվի բանտում։

Եթե չես բռնվել, ուստի հանցանք չկա։

Նշենք, որ հատկապես համայնքներում զավեշտալի իրավիճակ էր ստեղծվել․ երբեմն մեկ հարևանը ՀՀԿ-ի համար էր փող բաժանում, կողքի հարևանը՝ ԲՀԿ-ի, իսկ Դաշնակցությունը գնում էր պոչից:

Ասում են՝ դաշնակները չեն սիրում փող բաժանել, սիրում են հավաքել։

Ի դեպ, միշտ էլ և այսօր ևս, դատելով կուսակցությունների վարքագծից՝ ԲՀԿ-ականները, կամ ԲՀԿ-ում հայտնված ՀՀԿ-ականներն ամենաշռայլն են։

Այսօր ԱԺ-ում հայտնվելու նախապայման է ընտրակաշառքը, գոնե այսպես հավանականություն կա պատգամավոր դառնալու, իսկ եթե թողնեն՝ ով ինչպես որոշի, ապա այդ իրավիճակը իսկական փորձություն կլինի երկրի կուսակցությունների համար։

Քաղաքական գործիչները լավ են հասկանում, որ որևէ հեղինակություն չունեն հանրության մոտ, երկիրն անգամ խոստումներին արդեն չի հավատում, և սա քաղաքական գործիչների միակ կայուն և ձեռք բերած արժանիքն է։ Այնպես որ՝ մնում է ընտրակաշառքը։

Ազնիվ, արդար, թափանցիկ ընտրությունների պարագայում կուսակցությունները կհայտնվեն հայելու առջև՝ տեսնելու իրենց կուսակցության և անձամբ իրենց իրական դեմքը։

Շարմազանովը, սակայն, մեկ բան հաստատ գիտի, որ ընտրություններից երկու ամիս առաջ «ընտրակաշառք բաժանելու լուրերը սենսացիա են»:

Նա լավ գիտի, թե երբ են այն բաժանում։

Ի դեպ, որևէ քաղաքացի մտադիր չէ բողոքելու ընտրակաշառքի դեմ․ շուրջ 70 տոկոս աղքատության դեպքում մարդիկ երբեմն դեմ չեն անգամ 10 հազար դրամով ընտրելու, քանի որ այս տարիներն ապացուցել են, որ որևէ մեկից օգուտ չկա։

Ի դեպ, Շարմազանովի նման հայտարարության մեջ կա մեկ ճշմարտություն, որ նա անձամբ ընտրակաշառք չի բաժանել․ դրա համար մարդիկ կան:

Հո Շարմազանովն իր բան ու գործը չէ՞ր թողնի ու ընտրակաշառք բաժանի։

Նա ճառ ասի՞, թե՞ ընտրակաշառք բաժանի։

NEWSPRESS.am