«Իրատես». Ճիշտ ելքը «տուն վերադառնալն» է, բայց ոչ ոք չի ցանկանում հայտնվել Արգամիչի ու Սարգսյանի «արանքում»

«Իրատես» թերթը գրում է.

«Ասում են, թե «Ժառանգության»՝ Րաֆֆի Հովհաննիսյանի միակցումը «Օհանյան» դաշինքին Հովիկ Աբրահամյանի մերձավորներին հույսեր է «ներշնչել», որ այդ դաշինքի նկատմամբ «ոչ անտարբեր», դաշինքին պառլամենտում երկրորդ «հորիզոնական» տված Հովիկ Աբրահամյանին կհաջողվի ընդհատակից երկու` Ծառուկյան-Օհանյան ֆլանգով «մասնակցել» ընտրություններին:

Մեր տեղեկություններով, սակայն, «Օհանյան» դաշինքի ուժեղացմամբ շահագրգիռ է եղել նաև իշխանությունը, քանզի դաշինքի փլուզման դեպքում ուժեղանալու էր «Ծառուկյան» դաշինքը, ինչը չէր մտնում իշխանությունների պլանների մեջ, քանզի ընդդիմադիր դաշտն իշխանությունները փորձում են մոդերացնել մի քանի ֆլանգով, որպեսզի այնտեղ որևէ մեկը դոմինանտ չլինի: Ի դեպ, ՀՀԿ-ում Արգամիչին չեն մոռացել և համարում են, որ նրա համար միակ ճիշտ ելքը կրկին «տուն վերադառնալն» ու Սերժ Սարգսյանի հետ «լեզու գտնելն» է` «իր համար պատային այս վիճակում»:

Սա Արգամիչի շրջապատում նույնպես անհնար չեն համարում, սակայն որևէ մեկը մատը մատին չի խփում այդ ուղղությամբ, ինչպես եղավ Սարգսյան-Ծառուկյան «բանավեճի» ժամանակ, երբ Կարեն և Սամվել Կարապետյան եղբայրները «նոն ստոպ» ամեն ինչ արեցին, որ այդ «բանավեճը» շատ արագ հարթվի:

«Այսօր ոչ ոք, այդ թվում՝ Ծառուկյանը, չի ցանկանում հայտնվել Արգամիչի ու Սերժ Սարգսյանի «արանքում». նավը ափից, կարծես, մի քիչ շատ է հեռացել, չնայած, ասում են, քաղաքականության մեջ անհնար բան չկա»:

Մանրամասները՝ թերթի այսօրվա համարում