Տարբերություն չկա՝ մարդ վաճառում է իրեն ֆիզիկապես, թե հոգեպես. ակտիվիստը՝ ընտրակաշառքի մասին

Սոցհարցումների արդյունքում պարզվել է՝ Հայաստանի քաղաքացիները մեծ հաշվով հետաքրքված չեն առաջիկա խորհրդարանական ընտրություններով: Հարցին, թե ո՞ւմ եք ընտրելու, հարցվածների 95 տոկոսը պատասխանել է՝ «ով շատ փող տա՝ նրան»:

«Հայ ազգային կոնգրեսի» անդամ, ակտիվիստ Վարդան Հարությունյանը ևս քիչ չի հանդիպել մարդկանց, ովքեր խոստովանել են՝ կընտրեն նրան, ով շատ փող տա:

NEWSPRESS.am-ի թղթակցի հետ զրույցում կոնգրեսականը նկատում է. «Խնդիրն այն է, որ երբ Սերժ Սարգսյանը Սահմանադրությունը փոխելու որոշում կայացրեց, հարվածեց քաղաքական ու քաղաքացիկան պրոցեսներին»:

Հարությունյանի խոսքով՝ ժողովուրդը միշտ իշխանափոխությունը տեսել է նախագահական ընտրությունների միջոցով: Ու քանի որ նոր Սահմանադրությամբ անցում է կատարվում խորհրդարանական կառավարման, ուստի ԱԺ ընտրության հետ մարդիկ մեծ հույսեր չեն կապում: Մի կողմից այս հանգամանքը, մյուս կողմից էլ՝ սոցիալական ծանր վիճակը որոշիչ դեր են խաղում, ու մարդիկ ընտրակաշառք են վերցնում:

«Շատերը մտածում են՝ մեկ ա, իմ ձայնով բան չի փոխվելու, գոնե հիմա մի քանի կոպեկ փող կպոկեմ: Կարծում եմ, որ քարոզարշավի ժամանակ հնարավոր կլինի մարդկանց հասցնել գաղափարները՝ Ղարաբաղի հարց, սոցիալական հարց, ի վերջո իշխանությունը փոխելու հարց»,- ասում է մեր զրուցակիցն ու վստահեցնում, որ ՀԱԿ-ը գնալու է հենց այդ ճանապարհով. մարդկանց պետք է բացատրի՝ ինչ է նշանակում ընտրություն, քվե և քվեի արժեքը:

Վարդան Հարությունյանը մոտավոր հաշվարկներ է արել: Նրա տվյալներով՝ ՀՀԿ-ն մեկ ձայնի համար միջինը առաջարկում է 20.000 դրամ, որը 5 տարվա կտրվածքով (Աժ ընտրությունները 5 տարին մեկ են լինում) կազմում է օրական 11 դրամ։ Ակտիվիստն այս տեսանկյունից ունի իր դիտարկումը:

«Այսինքն՝ մարդը վաճառվում է օրական 11 դրամով… սա զավեշտալի է, քանի որ, օրինակ, մարմնավաճառների գինը միջինը կազմում է ժամը 15.000 դրամ։ Իհարկե, այնքան էլ տեղին չէ համեմատել, բայց կոնկրետ ինձ համար տարբերություն չկա՝ մարդ վաճառում է իրեն ֆիզիկապես, թե հոգեպես…»,- ընդգծում է ակտիվիստը: