«Ոնց որ սրտով չեք հանում». Վարչապետը փոխոստիկանապետին՝ տույժերը հանելու մասին

Կառավարության այսօրվա նիստում ոստիկանության պետի տեղակալ Վարդան Եղիազարյանը կառավարության հաստատմանը ներկայացրեց նախագիծ, ըստ որի՝ ոլորտում իրականացվելու է բարեփոխումներին ուղղված 24 միջոցառում: Փոխոստիկանապետը նշեց, որ բոլոր ջանքերը միտված են լինելու բնակչությանը մատուցվող ծառայությունների որակի բարձրացմանը:

«Օրինակ մեր քաղաքացիների համար ի՞նչն է փոխվելու»,- փոխոստիկանապետին արձագանքելով՝ հարցրեց վարչապետը:

«Պարո′ն վարչապետ, նախ թեթևացնում ենք վարչական բեռը: Բավական դյուրինացնում ենք էն բոլոր փողոցային երթևեկության կանոնները..…»,- թվարկեց Եղիազարյանը:

«Ի՞նչ նկատի ունեք, երբ ասում եք, որ վարչական բեռն է թեթևանալու»,- հետաքրքրվեց Կարեն Կարապետյանը: Ի պատասխան վարչապետի՝ Վարդան Եղիազարյանը նշեց, որ նախկին տուգանքների վրա ավելացող 50 տոկոս տույժի փոխարեն կավելանա 25 տոկոս:

«Նվազեցնո՞ւմ ենք, թե՞ հանում ենք»,- հարցրեց վարչապետը: Վարդան Եղիազարյանը կրկնեց, որ նվազեցնում են:

«Էս մեր քաղաքացիներին էդ ա հետաքրքրում, որ դուք տուգանքների տույժերը հանում եք»,- ասաց Կարեն Կարապետյանը: Եղիազարյանը կրկնեց, որ չեն հանում, նվազեցնում են:

«Հիմա նվազեցնո՞ւմ, թե՞ հանում եք»,- կրկնեց Կարեն Կարապետյանը:

Վարդան Եղիազարյանը թերթեց ձեռքի թղթերն ու ասաց. «Հա, հանում ենք, պարո′ն վարչապետ»:

Ինչին վարչապետը ժպիտով արձագանքեց. «Ոնց որ սրտով չեք հանում, ոնց որ ցանկանալով չեք հանում: Պարո′ն Եղիազարյան, ոնց որ ընենց զոռով եք էս բանը բերել»: