Մուհամեդը չի գնում լեռան մոտ․ մամուլը դարձել է մարտադաշտ

Տարիների ընթացքում ձևավորված ավանդույթի համաձայն՝ ընտրությունները Հայաստանում ուրախ են անցնում. գաղտնիք չէ, որ մեծ ու փոքր կրթօջախները, բուժհիմնարկները, գերատեսչությունները, թաղապետարանները, մարզպետարանները, կարճ ասած՝ պետական կամ խոշոր մասնավոր կառույցներում ընտրությունները կանխորոշված են։

Այս մասին լուրերը, սակայն, չէին թափանցում մամուլ, քանի որ մեր երկրում գործում են գրված օրենքներ և կան չգրված օրենքներ․ վերջինս դրանց թվին է պատկանում։

Ազգային ժողովի այս ընտրությունների նախաշեմին այս օրենքը փոխվել է․ մամուլում հայտնվում է՝ թե այս կամ այն թեկնածուն ճնշումներ է բանեցնում որևէ կրթօջախի, բուժհիմնարկի կամ այլ պետական կառույցի աշխատակիցների նկատմամբ՝ իր թեկնածուի օգտին քվեարկելու համար։ Հետաքրքիր է՝ ինչո՞ւ է այսպես։

Այս իրավիճակը ցույց է տալիս, որ թեկնածուների, կուսակցությունների համար մամուլը ևս դարձել է մարտադաշտ, այստեղ կարելի է «սլիվ» անել, իհարկե, մինչև այդ էլ արվում էր, «ժողովրդի անունից՝ ժողովրդի համար», մտահոգությունները։

Այսօր ցույցերով, միտինգներով, հանրահավաքներով որևէ մեկին չես զարմացնի, սոցիալական պայմանները մարդկանց մոտ արդեն տրամադրություն չեն թողել հավաքների գնալու, իսկ մամուլ գրեթե բոլորն են կարդում, այն էլ՝ էլեկտրոնային մամուլ։ Հենց այստեղ էլ իրականացվում է թեկնածուների ընտրապայքարը։

«Մի խումբ բժիշկներ, մի խումբ դպրոցների տնօրեններ»․ մարդիկ, ովքեր տարիներ շարունակ աջակցել են ընտրություններում հիմնականում ՀՀԿ-ին ու ԲՀԿ-ին, այսօր չէին կարող դժգոհել, որ իրենց նկատմամբ ճնշումներ կան, սա զավեշտ է։

Եթե, օրինակ, Արարատի մարզի դպրոցների և բուժհիմնարկների տնօրենները բողոքում են Ալիկ Սարգսյանից և հատկապես՝ մարզպետ Արամայիս Գրիգորյանի ճնշումներից, հրաշալի հասկանում են, որ այս կառույցների ղեկավարները մարզպետի «կրնկի տակ են», իսկ թե ինչո՞ւ են բողոքում, չէ՞ որ վաղը կարող են հայտնվել փողոցում՝ պարզապես ղեկավարից մամուլով բողոքելու համար։

Այդ դեպքում ինչո՞ւ են անում. պարզ է, որ մարզում ավելին, քան Ալիկ Սարգսյանը և Արամայիս Գրիգորյանը, ուժ կա՝ Աբրահամյաննները, այդ է պատճառը, որ որևէ անուն նշված չէ, պարզապես ինֆորմացիա։ Չի բացառվում, որ անգամ բողոքներից ո′չ դպրոցների տնօրեններն են տեղյակ, ո′չ էլ բուժհիմնարկների, այն պարզապես էժանագին ինքնագովազդ է։

Արաբկիրի թաղապետարանի աշխատակիցների՝ ՍԱՍ-ի Արտակի օգտին քվեարկելու մասին ճնշումները ևս թափանցել են մամուլ․ այստեղ կարող է երկսայրի սուր լինել։ Վերջին շրջանում խոսում էին ՍԱՍ-ի Արտակի խնդիրների մասին, սակայն նաև չի բացառվում, որ նա կորցրել է ՀՀԿ-ի բարեհաճությունը։

Այնպես որ՝ այս ԱԺ ընտրությունները հանրահավաքային չեն լինելու՝ մարտադաշտը տեղափոխվել է մամուլ։

NEWSPRESS.am