«Իմ աղոթքի լեզուն». Մայրենի լեզվի օր (լուսանկարներ)

Հայերենը՝ իբրև Արարատյան լեզու, կոչվում է «Աղոթքի լեզու»,

այն աստվածային ճոխ ու աննման լեզու է:

Ջորջ Բայրոն

Մայրենի լեզվի միջազգային օրվա առթիվ Երևանի Րաֆֆու անվան թիվ 36 հիմնական դպրոցում կազմակերպվել էր բաց դաս՝ «Իմ աղոթքի լեզուն» խորագրով: Այն 7-րդ դասարանի աշակերտների հետ կազմակերպել էր հայոց պատմության և հայ եկեղեցու պատմության ուսուցիչ, հումանիտար առարկաների մեթոդմիավորման նախագահ Արտակ Հակոբյանը:

Միջոցառմանը հրավիրված էին աշակերտների ծնողները, մանկավարժները և Արաբկիր վարչական շրջանի դպրոցների հայոց լեզվի ուսուցիչներն ու մեթոդմիավորման նախագահները:

Յոթերորդցիներն իրենց ուսուցչի օգնությամբ մաշտոցյան շունչ էին հաղորդել դասասենյակին՝ պատկերազարդ տառերով, հայ գրականության մեծերի նկարներով ու գեղեցիկ տապանով, որի մեջ ամփոփված էր հայոց տառերի հավերժ կանգուն ծառը:

Աշակերտները բանաստեղծությունների, երգերի ու պատմությունների միջոցով ներկաներին փոխանցեցին մեր հանճարների թևավոր մտքերը հայոց լեզվի մասին և ներկայացրին մեսրոպյան գրերի անցած դժվարին ուղին:

Նրանք իրենց խոսքում նշեցին, որ թեև օտար լեզուները մեզ զինում են հիմնարար գիտելիքներով, նպաստում կյանքի դժվարին փորձությունների հաղթահարմանը, սակայն հոգու լեզուն, միևնույնն է, մայրենին է: Նկարագրելով մայրենի լեզուն՝ աշակերտները նշեցին նաև, որ լեզուների մեջ հայերենը բացառիկ է, նախ` որպես զարմանալի տրամաբանական լեզու, ապա նաև` նոր բառեր կազմելու ճկունությամբ:

Ամփոփելով միջոցառումը՝ աշակերտները ներս բերեցին լույսի կանթեղը, փուչիկներով ձևավորված հայոց եռագույնն ու պաստառ՝ «Հայր մեր» աղոթքով:

Դպրոցի տնօրեն Նունե Ղազարյանը, շնորհակալություն հայտնելով կազմակերպված միջոցառման համար, իր գոհունակությունը հայտնեց, որ կարևորվում է այս օրը և որ մայրենիի հանդեպ նման վերաբերմունք կա: «Սիրե′ք մայրենին, որ ճիշտ դաստիարակեք և ուսուցանեք գալիք սերունդներին»,- ասաց Նունե Ղազարյանը:

Յոթերորդ դասարանի դասղեկ Լաուրա Շահվերդյանն էլ նշեց, որ միջոցառման ողջ ընթացքում ցանկանում էր հայտնվել իր աշակերտների կողքին ու նրանց հետ գովերգել մայրենին:

Արտակ Հակոբյանն իր հերթին նշեց, որ իրենցից յուրաքանչյուրը հպարտանում է պերճաշուք հայոց լեզվի գեղեցկությամբ, մեսրոպյան տառերով, հայոց գրի բազմադարյան պատմությամբ: «Եթե մենք ուզում ենք, որ մեր լեզվի գեղեցկությունը չկորչի և հասնի հաջորդ սերունդներին, ինչքան հնարավոր է պետք է խոսենք անաղարտ հայերենով»,- ընդգծեց ուսուցիչը:

Հիշեցնենք, որ 1999 թ. նոյեմբերի 17-ին ՅՈՒՆԵՍԿՕ-ի Գերագույն համաժողովի 30-րդ նիստում փետրվարի 21-ը հռչակվել է Մայրենի լեզվի միջազգային օր, որը նշվում է սկսած 2000 թվականից: Օրվա խորհուրդն ու նպատակն է՝ նպաստել լեզվական և մշակութային բազմաձևության զարգացմանը: