Իգնատի Առաքելյանը Սերգո Կարապետյանին գերազանցեց

ՀՀ գյուղատնտեսության նախարարությունը և Ագրոարհմիությունը համագործակցության հուշագիր են ստորագրել։ Նախարար Իգնատի Առաքելյանն ասել է․ «Մեր նպատակն է այս հուշագրով ստեղծել մի հարթակ, որի միջոցով գյուղացիական տնտեսությունները կկարողանան դիմել և ստանալ իրավաբանական աջակցություն: Հուսով եմ՝ այն կնպաստի գյուղացիների սոցիալ-տնտեսական կյանքի բարելավմանը և իրավական դաշտում նրանց իրավունքների պաշտպանությանն ու խնդիրների լուծմանը»։

Նշենք, որ գյուղատնտեսության զարգացումը չի սկսում հուշագրերից և գյուղացիական տնտեսությունների իրավունքներն այնքան էլ խախտված չեն, որ այն արժանարար նախարարության ուշադրությանը։

Գյուղնախարարությունը նախ պետք էր հասկանար, թե ինչո՞ւ են այս տարիներին կրճատվել մշակվող հողատարածքները, թե ինչո՞ւ ոռոգման ջուրը ոչ բոլոր բնակավայրերին է հասու, եթե հասնում է վարելահողեր, համայնք կա, 20 օրը մեկ անգամ։ Նախարարությունը նաև պետք է ուշադրություն դարձներ անորակ սերմացուների ներկրման և ցածր բերքատվության խնդրին, դիզվառելիքի և պարարտանյութերի անտրամաբանական գնմանը, ծանր մետաղներով հագեցած գյուղմթերքի արտադրությանը և այլն. դրա փոխարեն ագրոարհմիության հետ հուշագիր է կնքում։

Ողջ աշխարհում արհմիությունները պայքարում են տվյալ ոլորտի, այս դեպքում՝ հողամշակների իրավունքների համար, և դա է նմանատիպ կառույցների կոչումը, սակայն համագործակցել պետական կառույցի հե՞տ՝ սա արդեն նորություն է։

Նշենք, որ ընդհանրապես աշխարհում արհմիությունները պայքարում են պետական ապարատի դեմ, ցույցերի կամ այլ միջոցներով պահանջում են ոտնահարված իրավունքների վերականգնում, իսկ Հայաստանում արհմիություն ասվածը, որպես այդպիսին, գոյություն չունի, գյուղացիների իրավունքները որտեղ են սկսվում և ավարտվում՝ հայտնի չէ, և շատ քչերը գիտեն, որ ինչ-որ արհմիություն կա, որ իրենց պաշտպանում է, ավելին՝ այդ արհմիությունը հուշագիր է ստորագրում գյուղնախարարության հետ։ Սա արդեն շատ է հետաքրքիր։

Ի դեպ, զբաղվելու են խորհրդատվությամբ, որը ոչ պակաս է արժանի ուշադրության։

Այս տարիներին գյուղոլորտում միջազգային դոնորների, կառույցների կողմից միլիոնավոր դոլարների վարկեր են տրամադրվել, որոնց առյուծի բաժինը հասել է խորհրդատվությանը։ Ի՞նչ են արել՝ ոչինչ։ Անգամ Վերահսկիչ պալատն էր անդրադարձել խորհրդատվությունների խնդրին՝ այն գնահատելով անարդյունավետ։

Լավ, այդ դեպքում գյուղնախարարության ինչի՞ն է պետք նման հուշագիր։ Գուցե այլ զբաղմունք չունե՞ն երկարատև ձմռան ընթացքում։ Չի բացառվում։

Կարճ ասած՝ Իգնատի Առաքելյանն այս ոլորտում մեկ մեծ քայլ Սերգո Կարապետյանից առաջ է․ նախկին նախարարը հասկանում էր, որ արհմիությունը և նախարարությունը չեն կարող համատեղ աշխատել, տարբեր ֆունկցիաներ են կատարում, իսկ Առաքելյանն արհմիությունը պարզապես կցեց գյուղնախարարությանը՝ դե, եթե գոյություն ունեք, ուրեմն միայն մեզ հետ։

NEWSPRESS.am