Հայոց եկեղեցին միշտ իր բանակի կողքին է (լուսանկարներ)

Հակառակորդին դիմակայելու և թշնամուն արժանի հակահարված տալու համար հայ հոգևորականները բոլոր ժամանակներում գոտեպնդել են զինվորներին: Այսօր արդեն Հայոց եկեղեցու սպասավորները ծառայում են Զինված ուժերում՝ որպես զորամասերի գնդերեցներ: Նրանց թիվը ՀՀ ԶՈւ-ում 5 տասնյակից ավելի է:

ՊՆ 3-րդ բանակային կորպուսի N զորամասի գներեց Նվեր սարկավագ Աբգարյանը NEWSPRESS.am-ի թղթակցի հետ զրույցում նկատում է, որ իրենք փորձում են զինվորների մոտ բարձրացնել հայ ազգային ոգին ու փոխանցել նրանց Քրիստոսի պատգամը՝ չկա ավելի մեծ սեր, քան այն, որ մարդը փորձում է սիրել ու իր անձը նվիրել իր ընկերոջը:

Կարևորելով զինվորի ներաշխարհի խաղաղությունն ու հոգևոր սնունդը՝ գնդերեցները զորամասերում զրուցում են զինվորների հետ ու պատասխանում նրանց հուզող բոլոր հարցերին:

Զինվորներից մի քանիսը մեզ հետ զրույցում նկատեցին, որ եկեղեցական ծեսերն ու գնդերեցների հետ զրույցներն իրենց դրական ազդեցությունն են թողնում և օգնում՝ ողջ ծառայության ընթացքում: Զորամասում կա նաև մատուռ, որտեղ զինվորները մոմեր են վառում և իրենց աղոթքը բարձրացնում առ Աստված:

zinvorner

N զորամասի անձնակազմի հետ տարվող աշխատանքների գծով տեղակալ, մայոր Արմեն Սարգսյանը նկատում է՝ զորամասում հոգևոր դաստիարակությունն անհրաժեշտ է: Նրա դիտարկմամբ՝ գնդերեցն ավելի մասնագիտացված է զինվորի հետ աշխատում և մեծ ներդորում ունի հոգևորի ամրապնդման ու պահպանման գործում: Ի դեպ, հենց մայոր Սարգսյանի խաչքավորությամբ էլ այս տարի կատարվեց ջրօրհնեքի արարողություն: Մեծ հանդիսությամբ օրհնվեց ջուրն ու բաժանվեց զինվորներին: Արմեն Սարգսյանը լավ է գիտակցում՝ ստանձնելով խաչքավորի պարտավորությունը՝ իր վրա մեծ պատասխանատվություն է վերցնում:

jrorhneq

«Խաչքավորությունն արդեն իսկ պարտավորեցնող է, և քանի որ ամբողջ զորամասի առաջ ստանձնել եմ այդ պարտավորությունները, ուստի պարտավոր եմ իմ ծառայությունները կազմակերպել ի շահ մեր զինվորի, մեր զորամասի ու մեր Զինված ուժերի»,- ասում է Արմեն Սարգսյանը:

Նույն օրը զորամասի ճաշարանում կատարվեց նաև տնօրհնեքի կարգ: