«Զարուհուն ասում էին՝ չէ՛, մեր նպատակը մանդատը չէ. արդյունքը լինելու է մի քանի մանդատ ստանալը»

Այն, որ «Ժառանգություն» կուսակցությունում լարվածություն էր առաջացել, ու Զարուհի Փոստանջյանը դուրս է եկել կուսակցությունից՝ վերլուծաբան Ստյոպա Սաֆարյանին ամենևին էլ չի զարմացնում. դա նրա համար նորություն չէր:

Նախկին ժառանգականը NEWSPRESS.am-ի հետ զրույցում նկատեց, որ դեռ 2013 թվականի վերջին կուսակցությունը որդեգրեց մի ուղի՝ մի կողմ թողնելով գաղափարախոսությունը և արտաքին ու ներքին քաղաքականության տարաձայնությունները, միավորել ցանկացած ուժի, որի նպատակը կլինի իշխանափոխությունը:

Ստյոպա Սաֆարյանը հիշեցնում է, որ հենց այդ նպատակով էլ «Ժառանգությունը» միացել էր քառյակին:
«Ես ու մի քանի կուսակից ընկերներ, քննարկումների ժամանակ չէինք պաշտպանում այս տեսակետը: Այդ շրջանում Զարուհին բացակայում էր երկրից: Ճիշտ է՝ այն ժամանակ այդ նպատակը չիրականացավ, քանի որ քառյակը տապալվեց: Այնպես որ՝ այս գաղափարը նոր բան չէ, պարզապես Զարուհին չգիտեր դրա մասին…»,- հիշում է նախկին ժառանգականը:

Նա վստահեցնում է՝ այն, որ այս ուղեգիծը փոխել չի լինի, գիտեր ի սկզբանե: «Եթե կուսակցության ղեկավարը շարժվում է այդ ուղեգծով՝ այն հնարավոր չէ փոխել»,- ասում է Սաֆարյանն ու նկատում, որ իր կուսակիցների նման ինքը երկար չի պայքարել, այլ ուղղակի հեռացել է: Նրանից հետո Անահիտ Բախշյանն է համոզվել, որ պայքարելն անիմաստ է, իսկ այսօր արդեն հերթը հասել է Զարուհի Փոստանջյանին:

«Մեզնից յուրաքանչյուրն իր փորձով համոզվեց, որ «Ժառանգության» այդ կուրսը պարզապես անքակտելի է… Ցավում եմ, որ թիմը, որը հրաշալի ներկայացավ հասարակությանը և անցավ հրաշալի ճանապարհ՝ նման ճակատագիր ունեցավ»:

Ինչ վերաբերում է Օսկանյան-Րաֆֆի-Օհանյան դաշինքին, ապա, ըստ Ստյոպա Սաֆարյանի՝ այն հակասական դաշինք է. նա չի տեսնում, թե ինչպես տարբեր մոտեցումներով ուժերը կարող են հաշտեցնել իրենց դիրքորոշումները՝ տարբեր հարցերի շուրջ:

«Այն տպավորությունն ունեմ, որ խուսափելու են խոսել դրա մասին, քանի որ ո՛չ Վարդան Օսկանյանն է հրաժարվելու իր աջարկած Մադրիդյան սկզբունքներից, ո՛չ Րաֆֆի Հովհաննիսյանն է հրաժարվելու Ղարաբաղը ճանաչելու իր գաղափարից, իսկ Օհանյանն էլ կանգնելու է այն գծի կողքին, որը տարիներ շարունակ պաշտպանել է իշխանության ներսում: Բոլորը իրենց դեմքը չկորցնելու համար նախընտրելու են չխոսել շատ խնդիրների մասին: Ռիսակային դաշինք է… ես երկար կյանք չեմ տեսնում»,- ասում է Սաֆարյանը:

Նրա դիտարկմամբ՝ եթե նույնիսկ այս դաշինքը խորհրդարանում հայտնվի, ապա անհասկանալի է, թե ինչպես են քվեարկելու այս կամ այն հարցի քննարկման ժամանակ:

«Եթե միակ միավորող բանը իշխանությանը տապալելն է ու չեն տապալելու, այսինքն՝ համատեղ դրված խնդիրը չեն իրականացնելու, ապա ի՞նչ են անելու հետո… լավագույն դեպքում՝ մի քանի մանդատ ԱԺ-ում: Մինչդեռ Զարուհուն ասում էին, թե չէ՛, մեր նպատակը մի քանի մանդատը չէ: Արդյունքն ավելի մոտ է լինելու մի քանի մանդատ ստանալուն, քան այն նպատակին, որ իրականում դրված էր կուսակցության առաջ»,-եզրափակեց նախկին ժառանգականը: