Դպրոցներին կից կրպակները դեռահասներին սեռական հարաբերություններ են քարոզում (լուսանկարներ)

Եվրոպական երկրներում գրեթե ամենուրեք պահպանակներ վաճառելը թերևս նորմալ է դիտվում: Վերջերս Հայաստանում ևս պահպանակ կարելի է տեսնել շատ վաճառակետերում, օրինակ՝ հենց թերթի կրպակներում: Մի կողմից լավ է, երբ պետք եղած ժամանակ կարող ես գտնել պահպանակ ցանկացած խանութում կամ կրպակում: Մյուս կողմից՝ մասնագետները խորհուրդ են տալիս գնել պահպանակներ միայն դեղատներից, որտեղ դրանք պահվում են ավելի լավ պայմաններում, և գնորդներին հարկ եղած դեպքում բացատրում են դրանց օգտագործման եղանակը:

Այս տեսակետից թերևս կրպակի աշխատողները զիջում են իրենց դիրքերը: Բայց սա հարցի միայն մի կողմն է: Կրպակները հիմնականում տեղակայված են դպրոցներին կից տարածքներում, և հետևաբար չի բացառվում, որ պահպանակների գնորդները լինեն նաև անչափահաս երեխաները, ովքեր գրչի կամ տետրի համար անմիջապես վազում են մոտակա կրպակն ու տեսնում ցուցափեղկին շարված մերկ կնոջ սեքսուալ մարմնով նկարով տուփերը: Ստացվում է, որ դպրոցներին կից թերթի կրպակները դեռահասներին սեռական հարաբերություններ են քարոզում:

Սեքսապաթոլոգ-հոգեթերապևտ Մարատ Զաքարյանն ընդհանրապես ճիշտ չի համարում դպրոցին կից վաճառակետերում ալկոհոլային խմիչքներ, ծխախոտ ու առավել ևս պահպանակ վաճառելը: Նա NEWSPRESS.am-ի հետ զրույցում նկատում է, որ դա մի որոշ ժամանակ նույնիսկ արգելվեց: Սակայն այսօր միանշանակ ասել, որ սխալ է կրպակներում պահպանակ վաճառելը՝  ևս ճիշտ չի համարում:

«Հարցը 10-12 տարեկան երեխաների մասին չէ, ովքեր նույնիսկ գուցե պատկերացում չունեն՝ ինչի մասին է խոսքը, հարցն այն է, որ 15-16 տարեկան դեռահասն անհրաժեշտության դեպքում պետք է օգտվի պահպանակից՝ հնարավոր բոլոր խնդիրներից խուսափելու համար: Ու հարցն այն է, որ նա հենց առաջին պատահած կրպակից կարող է վերցնել պահպանակ, իսկ եթե մոտ վաճառակետ չլինի՝ հնարավոր է նա այդպես էլ չվերցնի, և հետո խնդիրներ առաջանան…»,- ասում է սեքսապաթոլոգը:

Նա համաձայն չէ այն մտքին, որ սեքսապաթոլոգները, հավանություն տալով պահպանակների ամենուր անարգել վաճառքին, դեռահասներին մղում են սեռական հարաբերությունների:

«Ո՛չ, դա այսպես չէ… այստեղ հարցը վերաբերմունքն է»,- ասում է մասնագետն ու հիշեցնում, որ ժամանակին բարձրացրել են բարձր դասարաններում համապատասխան բացատրական դասընթացների անցկացման հարցը, որը, սակայն, կյանքի չի կոչվել:

Այդուհանդերձ, նա դեռահասներին հորդորում է՝ պահպանակներ գնելիս դիմել դեղատուն, որտեղ կարող են նաև ճիշտ խորհրդատվություն ստանալ: Ինչ վերաբերում է դպրոցներին կից գործող կրպակների աշխատակիցներին, ապա նրանցից շատերը դեմ են եղել իրենց վաճառակետում պահպանակներ վաճառելուն, սակայն նրանց կարծիքն այդպես էլ ոչ-ոք չի լսել:

Արմինե Մկրտումյան