Եվրոպայի հայկական միությունների ֆորումի նախագահ Աշոտ Գրիգորյանի հայտարարությունը

«Եվրոպայի հայկական միությունների ֆորումի նախագահությունն այսօր առավոտից ստացել է բազմաթիվ հեռախոսազանգեր և հարցեր կապի բոլոր հնարավոր միջոցներով՝ Երևանում սերժսարգսյանական ռեժիմի կողմից սկսված ընդդիմադիր որոշ գործիչների նկատմամբ ահաբեկչության կազմակերպման շուրջ։

Ես՝ որպես ֆորումի նախագահ, փորձեցի հասկանալ իրավիճակը՝ անձամբ կապ հաստատելով «Համախմբում» դաշինքի առանցքային ղեկավարների հետ։

Ըստ մեր ստացած նախնական տեղեկությունների՝ իսկապես կարծիք է կազմվում, որ ռեժիմն անցել է իր սովորական կեղտոտ մեթոդներով գործընթացների իրականացմանը։

Քանի որ մենք ժամանակին ականատես ենք եղել Վարդան Օսկանյանի նկատմամբ կիրառված սերժսարգսյանական գործելաոճի անփառունակ մեթոդներին և հիշում ենք, թե ինչպես նրա ձեռքից վերցրեցին պատգամավորական անձեռնմխելիության մանդատը՝ մեղադրելով այսպես կոչված «փողերի լվացման» շուրջ և ինչպես քրեական մարմինները ողջ հայության աչքի առաջ խայտառակ են եղել՝ նույնիսկ դույզն-ինչ կասկածելի գործարք չհայտնաբերելով Օսկանյանի գործունեության մեջ։

Այնուհետև մենք բոլորս լավ ենք հիշում, որ ռեժիմը գործեց իր դասական մեթոդով և հանկարծ Վարդան Օսկանյանի որդու գրպանում թմրանյութ «հայտնաբերվեց»։

Այսօր այս ռեժիմը չունենալով այլ հնարավորություն կեղտոտելու, պղծելու իսկապես ընդդիմադիր կեցվածք ունեցող դաշինքի գործունեությունը՝ փորձում է կրկնել իր անցած անփառունակ ուղին․ կրկին «գործ» են սարքում Վարդան Օսկանյանի վրա։ Ըստ մեր ունեցած հավաստի տվյալների` Օսկանյանի տղան իսկապես հանդիպել է սիրիահայ գործընկերոջ հետ՝ քննարկել են որոշ գործարքներ, որի էությունը մեզ չի հետաքրքրում, սակայն հետաքրքրում է այն, որ նրանք իրենց զրույցն ավարտել են ռեստորանում և բաժանվել են։

Ակնհայտորեն սիրիահայի վրա ճնշումներ բանեցնելով իրենց համար սովորական մեթոդներով՝ քննչական մարմինները «գործ են շինել»։

Մամուլում հայտնվել են միշիկյան մամլո հայտարարություններն այն մասին, որ ծեծկռտուք է տեղի ունեցել «Համախմբման» ղեկավարների միջև։ Սա անմիջապես հերքվեց «Համախմբման» ղեկավարության կողմից՝ իմ ունեցած անձական հեռախոսազրույցի ընթացքում։

Ինձ հայտնեցին, որ Անդրանիկ Թևանյանի և «Համախմբման» ղեկավարի միջև եղել է վեճ, որը պատիվ կբերեր նույն ՀՀԿ-ին, եթե հարցերի քննարկումներն այնտեղ ևս լինեին քննարկումներ և ոչ թե միաձայն՝ իրենց արքայի հայացքի ներքո ընդունված որոշումներ։

Կամ մի այլ կեղծ և ծիծաղելի հայտարարություն, որ Վարդան Օսկանյանը լքել է իր առանձնասենյակը և տեղափոխվել Սեյրան Օհանյանենց շենք։

Այս լուրի մեջ ճիշտը միայն տեղափոխվել բառն է համապատասխանում իրականությունը, այո, համախմբումը տեղափոխվել է ավելի մեծ տարածքներ՝ իր գործընկերոջ հնարավորությունից օգտվելով։ Սա ևս բնական է և այն ներկայացնել որպես վեճի արդյունքում կայացած որոշում՝ ծիծաղաշարժ է։

Ես՝ որպես ֆորումի նախագահ, հայտարարում եմ, որ նման գործելաոճը պախարակելի է, քննարկվելու է եվրոպահայերի տարբեր հավաքույթների ընթացքում, մենք կատարելու ենք որոշակի հետևություններ և սատարելու ենք այն ուժերին, որոնք պայքարելու են սերժսարգսյանական գործելաոճով շարունակվող կեղծիքների դեմ։

Զարմանալիորեն պատմությունը կրկնվում է, և ընտրակեղծիքներին միշտ նախորդում են բազմաբնույթ այլ տիպի կեղծիքներ։ Մենք հետամուտ ենք լինելու դրանց բացահայտմանը»,- ասվում է Եվրոպայի հայկական միությունների ֆորումի նախագահ Աշոտ Գրիգորյանի հայտարարության մեջ։