Այն, ինչ ներկայացվել է «Համախմբում» կուսակցության մասին, խայտառակ կեղծիք է

NEWSPRESS.am-ի հավաստի աղբյուրների համաձայն՝ «Համախմբում» կուսակցության մասին պտտվող լուրերը կեղծ են և իրականությանը չեմ համապատասխանում:

Մեր աղբյուրի փոխանցմամբ՝ մամուլում շրջանառվող լուրերը պարզապես մտածված են քննչական մարմինների կողմից, որպեսզի վարկաբեկեն Օսկանյանին:

Ինչպես տեղեկացրեց մեր զրուցակիցը, Վարդան Օսկանյանի տղան՝ Արա Օսկանյանն իսկապես հանդիպել է սիրիահայի հետ ու հարցեր քննարկել նրա հետ, որից հետո ձերբակալվել է: Սակայն NEWSPRESS.am-ի աղբյուրը վստահեցնում է, որ Արա Օսկանյանի դեմ կա′մ կեղծ ցուցմունքներ են տվել, կա′մ նրա ցուցմունքները Քննչականը կեղծել է:

Ինչ վերաբերում է կուսակցության ներսում տեղի ունեցած ծեծկռտուքին, ապա նույն աղբյուրի հավաստմամբ՝ իրականում խոսակցություններ եղել են ոչ թե Վարդան Օսկանյանի և Անդրանիկ Թևանյանի միջև, այլ եղել են ներկուսակցական ընդհանուր թեժ քննարկումներ:

«Քննարկումները թեժ է եղել, բայց դա չի նշանակում, որ ինչ-որ մեկը նեղացել է, կամ այն վերածվել է ծեծկռտուքի»,- ասաց NEWSPRESS.am-ի զրուցակիցը՝ հավելելով, որ ծեծկռտուքը հորինված է, և նման բան հաստատ չի եղել:

Ինչ վերաբերում է Վահե Հովհաննիսյանին, ապա, մեր աղբյուրի փոխանցմամբ, նա եղել և մնում է «Համախմբման» սյուներից մեկը: Մեր զրուցակցի խոսքով՝ Վարդան Օսկանյանը Վահե Հովհաննիսյանին առաջարկել է նույնիսկ ավելի բարձր տեղ, իր տեղը, սակայն Վահե Հովհաննիսյանը հրաժարվել է՝ պատճառաբանելով, որ ինքը խորհրդարան մտնել չի ցանկանում:

«Վահե Հովհաննիսյանը մնում է «Համախմբման» սյուներից մեկը և Վարդան Օսկանյանի ձախ թևը: Եվ այն, ինչ ներկայացվել է, խայտառակ կեղծիք է»,- ասաց մեր զրուցակիցը՝ հավելելով, որ կեղծիքներն սկսվում են այսօր, ավարտվում՝ ընտրակեղծիքով:

Հիշեցնենք, որ մամուլում շրջանավող լուրերի համաձայն՝ 7or.am կայքի գլխավոր խմբագիր Անդրանիկ Թևանյանը «Համախմբում» կուսակցության գրասենյակում հարվածել է Վարդան Օսկանյանին:

Ծեծկռտուքի վերածված թեժ զրույցի պատճառը Վահե Հովհաննիսյանին դաշինքի համամասնական ցուցակում չներառելու՝ Օսկանյանի որոշումն է եղել, որից հետո ինքը՝ Վահե Հովհաննիսյանը, հայտարարություն է տարածել, թե չի ցանկանում մասնակցել ընտրություններին:

Միջադեպից հետո Վարդան Օսկանյանը հավաքել է իրերը և տեղափոխվել Սեյրան Օհանյանի գրասենյակ՝ հայտնելով, թե ինքը չի ցանկանում Անդրանիկ Թևանյանի հետ նույն տարածքում գտնվել:

Մեկ այլ տեղեկություններով էլ՝ փետրվարի 17-ին, Հայաստանի քննչական կոմիտեի Կոտայքի մարզային քննչական վարչության Կոտայքի քննչական բաժնի քննիչի որոշմամբ՝ ձերբակալվել է Վարդան Օսկանյանի 33-ամյա որդին՝ Արա Օսկանյանը: Նա կասկածվում է Աբովյան քաղաքում սիրիահայ, 30-ամյա Նժդեհ Բերբերյանին ազատությունից ապօրինաբար զրկելու և սպանության սպառնալիքի տակ առևանգելու մեջ։