Եթե մենք փորձենք օրենքներն էմոցիոնալ մեկնաբանել՝ լավ բանի չենք հասնի. վարչապետ

ՀՀ վարչապետ Կարեն Կարապետյանը չգիտի՝ կա՞ն արդյոք Հայաստանում քաղբանտարկյալներ, թե՞ ոչ: Համենայնդեպս նա այսօր` Երևանի պետական համալսարանում ուսանողների հետ հանդիպման ժամանակ, պատասխանելով ուսանողների տված այդ հարցին՝ ասաց. «Եթե անկեղծ, ապա չգիտեմ՝ կան քաղբանտարկյալներ, թե՞ ոչ»։

Նրա անորոշ պատասխանից հետո, հնչեց հաջորդ հարցը՝ արդյոք Գևորգ Սաֆարյանը, Շանթ Հարությունյանը, «Հաց բերող» Արթուր Սարգսյանը քաղբանտարկյալներ չե՞ն, ինչին վարչապետն արձագանքեց, թե դա նրանց կարծիքն է:

«Տեսե՛ք, եթե մենք ուզում ենք ունենալ կանոնավոր պետություն, յուրաքանչյուր մարդու նկատմամբ, անկախ մեր ներքին սիմպատիաներից, բոլոր այդ մարդկանց նկատմամբ ունենք և՛ հարգանք, և՛ դրական վերաբերմունք՝ այն մասնակցության համար, որ նրանք ունեցել են մեր անկախության, անվտանգության հարցերում, բայց պետությունն ունի օրենքներ, որոնք խախտելու ինդուլգենցիան ոչ մեկը չունի։ Այլ հարց է, որ մենք կարող ենք օրենքները մեկ-մեկ մեկնաբանել, մեկ-մեկ մեկի վրա կիրառել, մեկի վրա չկիրառել, դա էլ է իրականում վատ պրակտիկա, բայց եթե մենք ռեգուլյար էմոցիոնալ փորձենք այդ օրենքները մեկնաբանել, մենք լավ բանի չենք հասնի»,- ասաց վարչապետը:

Անդրադառնալով իր կառավարման հինգ ամսվա ընթացքում կառավարության կատարած աշխատանքին՝ Կարեն Կարապետյանը նշեց, որ կառավարությունը յուրաքանչյուր ճյուղի վերաբերյալ ախտորոշում է տվել, թե ինչ խնդիրներ կան, և իրենք զարգացման ինչ տեսլական ունեն:

Լրագրության ֆակուլտետի ուսանողներից մեկի հարցին, թե որո՞նք են երիտասարդության խնդիրները և ի՞նչ ախտորոշում է տրվել դրանց, վարչապետը պատասխանեց. «Ես երիտասարդներին ախտորոշում չեմ կարող տալ, որովհետև իրենք շատ լավ ներկայանում են, հետևաբար այդ իրավունքը չունեմ»: