Միրգն ու բանջարեղենը թանկացել են

2017թ. հունվարին 2016թ. դեկտեմբերի համեմատ հանրապետությունում արձանագրվել է պարենային ապրանքների 7.4% գնաճ, ինչի վրա իր անմիջական ազդեցությունն է թողել մրգի՝ 10.9%, բանջարեղենի և կարտոֆիլի ապրանքախմբերի 49.0% գնաճը: Դիտարկվող պարենային 13 ապրանքախմբից 8-ում նշված ժամանակահատվածում գրանցվել է 0.1-49.0% գնաճ, մեկում՝ 0.2% գնանկում, իսկ 4-ում գների մակարդակը նախորդ ամսվա համեմատ մնացել է անփոփոխ:

Բանջարեղենի և կարտոֆիլի ապրանքախմբում1 2017թ. հունվարին 2016թ. հունվարի համեմատ արձանագրվել է 10.6%, իսկ 2016թ. դեկտեմբերի համեմատ`49.0% գնաճ: 2017թ. հունվարին 2016թ. դեկտեմբերի համեմատ Հանրապետությունում գրանցվել է սնկի` 1.1%, սխտորի՝ 7.6%, ճակնդեղի` 13.7%, կարտոֆիլի` 16.6%, գլուխ սոխի` 18.0%, գազարի` 20.0%, բողկի`28.8%, վարունգի`35.4%, կաղամբի` 35.5%, կանաչ պղպեղի՝ 52.8%, սմբուկի` 63.2%, լոլիկի` 1.9 անգամ, խառը կանաչեղենի` 2.0 անգամ, կանաչ սոխի 2.2 անգամ գնաճ:

Հանրապետության դիտարկված բոլոր քաղաքներում 2017թ. հունվարին 2016թ. դեկտեմբերի համեմատ բանջարեղենի և կարտոֆիլի ապրանքախմբի գներն աճել են 44.7-64.2%-ով, ընդ որում, գնաճի ամենաբարձր ցուցանիշն արձանագրվել է ք. Կապանում: Մայրաքաղաքում բանջարեղենի և կարտոֆիլի ապրանքախմբի գների ընդհանուր մակարդակը նախորդ ամսվա համեմատ աճել է 44.8%-ով:

Մրգի ապրանքախմբում՝ 2017թ. հունվարին 2016թ. հունվարի համեմատ արձանագրվել է 19.4%, իսկ 2016թ. դեկտեմբերի համեմատ` 10.9% գնաճ: Վերջինիս մեծապես նպաստել է խաղողի`6.2%, ադամաթզի` 11.0%, կիտրոնի՝ 11.5%, ընկույզի միջուկի՝ 11.9%, խնձորի` 12.0%, տանձի` 14.6%, նռան` 19.6%, մանդարինի`35.6%, արքայանարնջի 52.9% գնաճը: Դրան զուգընթաց, 2017թ. հունվարին 2016թ. դեկտեմբերի համեմատ հանրապետությունում գրանցվել է չամիչի 3.9% գնանկում, իսկ նարնջի գինը նախորդ ամսվա համեմատ մնացել է անփոփոխ:

2017թ. հունվարին 2016թ. դեկտեմբերի համեմատ հանրապետության դիտարկված բոլոր քաղաքներում մրգի գներն աճել են 5.9-17.4%-ով, այդ թվում, գնաճի ամենաբարձր ցուցանիշն արձանագրվել է ք. Գավառում: Մայրաքաղաքում արձանագրվել է մրգի 9.6% գնաճ: