«Լավ կլինի «զուլալված» գնանք ընտրությունների». ՀԴԿ-ն լքում է Օսկանյան-Օհանյան-Դալլաքյան դաշինքը

Օսկանյան-Օհանյան-Դալլաքյան ձևավորվող դաշինքից Հայաստանի դեմոկրատական կուսակցությունից բացի, հնարավոր է լինեն նաև այլ ուժեր: Այս մասին լրագրողների հետ հանդիպման ժամանակ հայտնել է ՀԴԿ նախագահ Արամ Սարգսյանը՝ նշելով, որ իր կուսակցությունը դաշինքից դուրս գալու որոշում կայացրել է նախօրեին:

«Մենք ներկայացրել ենք 4 սկզբունքային դրույթ, որոնց շուրջ նախնական համաձայնության էինք եկել, սակայն կարճ ժամանակում հասկացանք, որ մեր պայմանավորվածությունները խախտվում են»,- ասաց ՀԴԿ ղեկավարը։

Նրա խոսքով՝ ամենակարևոր հարցը, որ պետք է քննարկվեր խորհրդում՝ դաշինքի ծրագիրն էր և այն, թե ովքեր են լինելու դաշինքի կազմում։ Մինչդեռ, մինչ օրս նման խորհուրդ ձևավորված չէ, իսկ ծրագրերի քննարկման մասին էլ որևէ խոսք չի եղել:

«Բոլորը կենտրոնացած են ցուցակների կազմման վրա, ինչը երկրորդական պետք է լիներ և սկզբունքային նշանակություն չպետք է ունենար»,- նկատում է Արամ Սարգսյանը:

Նա չի բացառում, որ շուտով դաշինքը կլքեն նաև «Երրորդ հանրապետությունը» և ԱԻՄ-ը: Համենայնդեպս, Արամ Սարգսյանի խոսքով, նրանք նման մտադրություն ունեն:

Արամ Սարգսյանը նշեց նաև, որ այս պահին այլ դաշինքների հետ լուրջ բանակցություններ են տարվում:

«Շատ ավելի լավ կլինի, եթե մենք, այսպես ասած, «զուլալված» գնանք ընտրությունների, քան այս անորոշության մեջ փորձենք ինչ-որ բան գտնել»,-ասաց ՀԴԿ նախագահը: