Լապշինին արտահանձնելու խնդրի իրական ու շատ կարևոր ենթատեքստը փորձում են դեմագոգիկ ծածկադմբոցի ճարակ դարձնել

Լապշինին Բաքու արտահանձնելու հարցի շուրջ NEWSPRESS.am-ը զրուցել է Արցախի նախկին արտգործնախարար Արման Մելիքյանի հետ:

Պարո՛ն Մելիքյան, այս օրերին մեծ աղմուկ բարձրացրեց Բլոգեր Ալեքսանդր Լապշինին Բաքու արտահանձնելու հարցը: Ի՞նչպես եք մեկնաբանում կատարվածը և ի՞նչ հետևանքներով է այն հղի:

Տեղի ունեցածը պաշտոնական Բաքվի կողմից նախաձեռնված իրավական գործընթացի արդյունք է և տեղավորվում է համապատասխան միջազգային ընթացակարգերի շրջանակներում՝ ըստ ադրբեջանական վարկածի պարոն Լապշինը հանցագործություն է կատարել, քանի որ ապօրինի հատել է Ադրբեջանի սահմանը: Անշուշտ, ամենայն հավանականությամբ Լապշինի պատմությունն ունի նաև իր գաղտնի կողմը, սակայն իրավական տեսանկյունից Բելառուսի և Ադրբեջանի իրավապահները առերևույթ պահպանել են պահանջվող նորմերը:Ադրբեջանն այժմ աշխարհով մեկ կարող է Արցախ այցելած անձանց նկատմամբ իսկական իրավական որս սկսել:

Ի՞նչ կարող էր անել հայկական դիվանագիտությունը արտահանձնումը կանխելու համար և ի՞նչ կարող ենք անել հիմա, երբ արտահանձնումը տեղի է ունեցել:

Հայկական կողմերը պետք է արմատապես վերանայեն սեփական քաղաքական ու դիվանագիտական մոտեցումները կարգավորման գործընթացի ողջ համատեքստում՝ այդ դեպքում հնարավոր կլինի կանխել նաև մեզ համար անչափ տհաճ ու վտանգավոր զարգացումները մի շարք առանձին ուղղություններով և այդ թվում նաև Արցախ այցելողների քրեական հետապնդումները:

Կարծիք կա, որ Լապշինի գործը հակառակ ազդեցություն է ունենալու՝  մեծանալու է հետաքրքրությունն Արցախի նկատմամբ: Արտաքին գործերի նախարարան էլ ԱԺ հարցուպատասխանի ժամանակ հայտարարել է, որ արտահանձնումից հետո մարդկանց հոսքն Արցախ ավելի է շատացել: Ինչպե՞ս եք գնահատում այս հայտարարությունները:

Ինքնախաբեություն է՝ տապալումները անաչառ կերպով վերլուծել է պետք, մինչդեռ դրա փոխարեն խնդրի իրական ու շատ կարևոր ենթատեքստը փորձում են դեմագոգիկ ծածկադմբոցի ճարակ դարձնել: