Ես խնդիր չունեմ ցուցակը գլխավորելու՝ հանուն դաշինքի. Վարդան Օսկանյան

Վարդան Օսկանյանը վստահ է, որ բավական հաջող ցուցակ կկարողանան կազմել: Այդ մասին նա հայտնել է լրագրողների հետ զրույցում՝ նշելով նաև, որ Վարդան Օսկանյան-Սեյրան Օհանյան դաշինքը դեռևս կազմավորման փուլում է:

«Ընտրական ցուցակի ներկայացման համար ժամանակ դեռ կա, և ճիշտ պահին ամեն ինչ կներկայացվի»,- ասել է «Համախմբում» կուսակցության առաջնորդ Վարդան Օսկանյանը:

Նա նշել է, որ թեև կան տարակարծություններ, սակայն հույս է հայտնել, որ  վերջիվերջո կգանք ընդհանուր որոշման:
Օսկանյանի խոսքով՝ բանակցություններ են ընթանում «Ժառանգություն» կուսակցության հետ:

Անդրադառնալով ԱԻՄ առաջնորդ Պարույր Հայրիկյանի հայտարարությանը, թե դաշինքում գզվռտոց է սկսվել, Օսկանյանը պատասխանեց. «Այդ գզվռտոց բառը ճիշտ բառ չէ, բայց բնական է, ամեն մի քաղաքական ուժ իր խնդիրներն է դնելու: Բոլորը համատեղվելու են, և քաղաքական ուժերը, նաև ելնելով ցուցակի կազմից, կարող են վերջնական որոշում կայացնել՝ մնում են դաշինքում, թե ոչ: Առաջիկա օրերին այդ առումով ամեն ինչ պարզ կլինի»,-ասել է Վարդան Օսկանյանը:

Վարդան Օսկանյանը չի բացառում, որ Սեյրան Օհանյանը կարող է գլխավորել ցուցակը: «Մենք ոչ մի հայտարարություն այդ մասին չենք արել, ուղղակի չենք բացառում, որ ինչու չէ, կարող է նաև Սեյրան Օհանյանը լինի: Ես միշտ ասել եմ, որպես կուսակցության ղեկավար՝ խնդիր չունեմ ցուցակը գլխավորելու՝ հանուն դաշինքի»,- ասաց նա: