Ադրբեջանի սադրանքներին հակազդելու համար հայկական կողմերը չեն կարողացել կամ զլացել են արդյունավետ միջոցներ մշակել

Վերջին օրերին ղարաբաղա-ադրբեջանական սահմանին արձանագրվել է լարվածության աճ: Թեմայի շուրջ NEWSPRESS.am-ին իր մեկնաբանությունն է տվել Արցախի հանրապետության նախկին արտգործնախարար Արման Մելիքյանը:

Պարո՛ն Մելիքյան, վերջին օրերին ղարաբաղա-ադրբեջանական սահմանին իրավիճակը լարվել է: Ի՞նչի հետ է դա կապված:

Դա կապված է այն իրողության հետ, որ ադրբեջանական կողմն իր քաղաքական նպատակներին հասնելու համար բացի դիվանագիտական միջոցներից կիրառում է սահմանային զինված բախումների ու միջադեպերի հրահրման մարտավարությունը: Դրան քաղաքական մակարդակում հակազդելու և կանխավ չեզոքացնելու համար անհրաժեշտ արդյունավետ միջոցները հայկական կողմերը (Ստեփանակետը և Երևանը) չեն կարողացել կամ զլացել են մշակել:

Որտե՞ղ է մեր դիվանագիտական թերացումը, ի՞նչ քայլեր պետք է ձեռնարկվեն այս ուղղությամբ:

Դա լուրջ և կարևոր թեմա է, սակայն դրա հետ կապված կոնկրետ գործողությունների վերաբերյալ բաց հանրային քննարկումներ անցկացնելը վնասակար կլինեն: Կարող եմ ընդամենն ասել, որ իրավիճակից դուրս գալու հնարավորությունը պահպանվում է:

Ի՞նչ կանխատեսումներ ունեք. կա՞ արդյոք իրավիճակի սրացման հավանականություն: 

Ադրբեջանի համար հաղթական ելքով արագընթաց պատերազմի հնարավորությունը բարձր չեմ գնահատում, եթե, իհարկե, մեր պարտությանն ուղղորդված կերպով նպաստող տարաբնույթ ներքին գործոններ ի հայտ չգան։