«Բելառուսի քայլն աննախադեպ լկտիություն ու ցինիզմ է»

Հայաստանի խորհրդարանն այսօր՝ փետրվարի 8-ին իր դիրքորոշումը հայտնեց Բելառուսի կողմից բլոգեր Լապշինին Ադրբեջանին արտահանձնելու հարցում:

Պատգամավոր Նիկոլ Փաշինյանը Բելառուսի այս քայլը նույնացրեց Հունգարիայի կողմից Ռամիլ Սաֆարովին Ադրբեջանին արտահանձնելու հետ: Նա կոչ արեց հավաքվել Հայաստանում Բելառուսի դեսպանատան շենքի մոտ ու բողոքի ակցիա անել:

«Բելառուսում Հայաստանի դեսպանին պետք է հետ կանչել, դիվանագիտական կոշտ միջոցներ ձեռնարկել»,- ասաց Փաշինյանը:

ՀՀԿ-ական Սամվել Ֆարմանյանը, հայտնելով իր տեսակետը՝ նկատեց, որ Բաքվի իշխանությունը կգտնի պատրվակ՝ Լապշինին Ռուսաստանին հանձնելու ուղղությամբ: «Անգամ Ստալինի նման բռնապետին չի հաջողվել մարդկանց ստիպել մտածել այնպես, ինչպես ինքն է ուզում: Բաքվին էլ դա չի հաջողվի»,- ասաց նա:

«Բելառուսի քայլն աննախադեպ լկտիություն ու ցինիզմ է»,- հայտարարեց ԲՀԿ խմբակցության ղեկավար Նաիրա Զոհրաբյանը: Նրա խոսքով՝ Հայաստանն այստեղ մեծ անելիքներ ունի: «Ես կողմ կլինեմ, որ այս պահին ՀԱՊԿ-ում Հայաստանի անդամությունը սառեցվի, հետ քաշվենք, մինչև իրավական ճանապարհով հարցին լուծում կտրվի»,- ասաց Զոհրաբյանը:

Նաիրա Զոհրաբյանին հակադարձելով՝ ՀՀԿ խմբակցության ղեկավար Վահրամ Բաղդասարյանը նկատեց, որ սա առաջին դեպքը չէ, երբ Բելառուսը կողմնակալ վերաբերմունք է ցուցաբերում Ադրբեջանի նկատմամբ: «Պարզ մանր գործարք է եղել՝ շքանշանի փոխարեն Լապշինի արտահանձնում… մենք չպետք է հարց բարձրացնենք, որ Հայաստանը դադարեցնի անդամակցությունը ՀԱՊԿ-ին, այլ պետք է հարց բարձրացնենք, որպեսզի Բելառուսը դադարեցնի»,- ասաց նա:

Արձագանքելով պատգամավորների հայտարարություններին՝ ԱԺ նախագահ Գալուստ Սահակյանը նկատեց, որ հարկավոր է կատարել առավելագույն քայլ:

«Ես կարծում եմ, որ սա սովորական խնդիր չէ, լուրջ քայլեր են պետք»,- ասաց ԱԺ նախագահը: