«Քաշից ավելի պարտավորություններ մի′ վերցրեք ձեզ վրա. քաղաքական գրիժան անբուժելի է»

Որոշ պաշտոնյաների ու մարզպետերի մոտ ադրենալինի և վատ խոլեստերինի ամպլիտուդի լուրջ տատանումներ են նկատվում: Վերջիններս իրենց գինը բարձրացնելու համար անցել են սպառնալիքների ու ահաբեկումների իրենց հոգեհարազատ ժանրին: Այդ մասին ԱԺ հայտարարությունների ժամին ասաց «Բարգավաճ Հայաստան» խմբակցության ղեկավար Նաիրա Զոհրաբյանը:

Նա, առանց անուններ տալու, նշեց, որ մարզպետերից մեկը հրավիրել է գյուղապետերին ու փորձել սպառնալ՝ հայտարարելով, որ «մարզում մառոզ անողն ինքն է»:

«Իհարկե, մառոզի լավագույն մասնագետն ԱԻՆ հիդրոմետ ծառայության պետ Գագիկ Սուրենյանն է, որի մոտ մառոզ անող մարզպետը կարող է հաստիքային պաշտոնի անցնել, և աշխատավարձի չափից հասկանալ՝ մառո՞զ է անում, ցունամի՞, թե ընդամենը քամու տատանում: Մեկ բան հստակ է՝ եթե այդ անձանց մոտ վստահության կատարյալ երաշտ է և փորձում են կոմպենսացնել մառոզներով ու այլ եղանակային տեղումներով, խոստանում եմ՝ շատ արագ մնալու են իրենց խոստացած մառոզի տակ»,- ասաց Զոհրաբյանը:

ԲՀԿ խմբակցության ղեկավարը հորդորեց քաշից ավելի պարտավորություններ չվերցնել իրենց վրա:
«Քաղաքական գրիժան անբուժելի է: Կոչ եմ անում՝ լրջորեն գնահատել ընտրության կարևորությունը ՀՀ ապագայի համար և չփորձել հին ու բարի ժանգլյորությամբ քվե սարքել, չի՛ ստացվի»,- ասաց նա:

«Այս դասին այսքանը»,- եզրափակեց Զոհրաբյանը: