Քաղաքական բլե՞ֆ, թե՞ աշխույժ վերադարձ. Վարդան Ղուկասյանի խնդրանքը՝ ՀՀԿ-ին

Օրեր առաջ Գյումրիի քաղաքապետ Վարդան Ղուկասյանը դիմում է ներկայացրել Հանրապետական կուսակցության տարածքային գրասենյակ՝ խնդրելով դադարեցնել իր անդամակցությունը կուսակցությանը: Նույն օրը գրասենյակում խորհրդի նիստում որոշվել է դադարեցնել նրա անդամակցությունը ՀՀԿ-ին:

NEWSPRESS.am-ի թղթակցի այն հարցին, թե մամուլում կան տեղեկություններ, որ գուցե 5 տարի առաջ Վարդան Ղուկասյանն արդեն իսկ լքել է կուսակցությունը, ՀՀԿ տարածքային գրասենյակի պատասխանատու Բորիս Ալեքսանովը պատասխանեց. «5 տարի առաջ, երբ Վարդան Ղուկասյանը մարզային խորհրդի նախագահի լիազորությունները դադարեցնելով՝ հայտարարեց, որ ցանկանում է նաև դուրս գալ Հանրապետական կուսակցության շարքերից, եղան հորդորներ, որ նա մնա կուսակցությունում: Իհարկե, չեմ ասի՝ ում կողմից: Դրանից հետո նա երբևէ չի առնչվել կուսակցության հետ և կարծել է, որ նաև դիմում է ներկայացրել, բայց իրականում դիմում չկար, ու երբ դա պարզվեց, դիմում ներկայացրեց»:

Եթե վերհիշենք, թե ով էր նիստը վարում, պարզ է, թե ով է հորդորել Վարդան Ղուկասյանին մնալ կուսակցության շարքերում՝ Հովիկ Աբրահամյանը, ով սատարում էր Գյումրիի նախկին քաղաքապետին:
Դիտարկմանը, թե գուցե Հովիկ Աբրահամյանը «Ծառուկյան դաշինքի՞ն» է աջակցելու կամ միանալու, ու Վ. Ղուկասյանն էլ հետևեց իր քաղաքական ընկերոջը և այդ դաշտ տեղափոխվեց, Բորիս Ալեքսանովը պատասխանեց. «Տրամաբանորեն կարելի է նաև էդպես մտածել, բայց, քանի որ խոսքը Հովիկ Աբրահամյանի ու Վարդան Ղուկասյանի մասին է, այս հարցին կարող է պատասխանել նրանցից մեկը»:

NEWSPRESS.am-ի թղթակիցը հարցն ուղղեց Վարդան Ղուկասյանին, ով ձեռնպահ մնաց որևէ բան նշելուց Հովիկ Աբրահամյանի, նրանց մտերմության ու ընտրություններում նրա մասնակցության վերաբերյալ:

Հարցին, թե 2012 թվականին Վարդան Ղուկասյանը չկարողացավ մասնակցել, նույնիսկ չթողեցին, որ առաջադրվի, Բորիս Ալեքսանովը պատասխանեց, որ եթե մարդն ուզում է մասնակցել՝ ոչ ոք չի կարող խանգարել, չեմ կարծում, որ որևէ ճնշում է եղել: «Բերեք խոստովանենք, որ հարուստ չենք քաղաքական գործիչներով, ինչ-որ տեղ ցավում եմ, որովհետև դժվար է գտնել քաղաքին նվիրված մարդկանց»,- ասաց Հանրապետական գործիչն ու հավելեց, որ այս ընտրություններին նախկին քաղաքապետի հայտնությունն աշխուժություն հաղորդեց, պետք է խոստովանել, որ նման մարդը չէր կարող չվերադառնալ: Նա միշտ էլ ասել է, որ կուսակցական չի եղել, բայց բավական օգնել է Հանրապետական կուսակցությանը, միջոցառումներ է կազմակերպել:

NEWSPRESS.am-ի թղթակցի հետ զրույցում Վարդան Ղուկասյանն էլ նշեց, որ չի առաջադրվելու ԲՀԿ ցուցակով, նա իր էությամբ կուսակցական չէ, դաշինքի անդամ է լինելու: Հարցին, որ շրջանառվում է այն, որ սա քաղաքական բլեֆ է, ու միայն իր անվան շուրջ հետաքրքրության համար է այս հայտարարությունը, Վարդան Ղուկասյանը պատասխանեց. «Սպասեք, կտեսնեք, իմ ռեյտինգի մասին բոլորը գիտեն, քիչ մնաց»: