Հովիկ Աբրահամյանը զգաց՝ կարող է ինքնուրույն ֆիգուր դառնալ ու պոկվեց դուրս. ամեն մի զինվոր ուզում է ձի ներկայանալ

Եթե Հայաստանում տիրող նախընտրական իրավիճակը նախագահի ինստիտուտի կողմից նույնիսկ վերահսկվում է, ապա նախագահականից խորհրդարանականի անցման դեպքում՝ այդ վերահսկողությունը թուլանում է: NEWSPRESS.am-ի հետ զրույցում Հայաստանում տիրող նախընտրական վիճակի ու ՀՀԿ-ից արտահոսքի մասին իր կարծիքը հայտնեց քաղաքագետ Լևոն Շիրինյանը: Նա իրավիճակը ներկայացնում է փոխաբերական իմաստով՝ համեմատելով շախմատի հետ:

«Օրինակ՝ տեսե՛ք, Հովիկ Աբրահամյանը նախագահի մերձավորն էր, բայց զգաց, որ կապերը թուլանում են, և ինքը կարող է ինքնուրույն ֆիգուր դառնալ ու պոկվեց դուրս: Խորհրդարանականի դեպքում այդպես է՝ վերահսկողությունը թուլանում է, և ամեն մի զինվոր ուզում է ձի ներկայանալ…»,- ասում է Շիրինյանը:

Ճշտող հարցին, թե ՀՀԿ-ից նեղացածները դուրս են գալիս և ո՞ւժ դառնում, քաղաքագետն արձագանքեց.
«Չէ՛, նեղացածը ո՞րն է, հիմա ամեն մեկն իրեն տղամարդ է զգում: Մինչ այդ նախագահի դիմաց ոտերի թաթերի վրա պարում էին, հիմա նրանցից ամենքն իրենց «փոքրիկ նախագահներ» են պատկերացնում, խմբի ղեկավար… ես ի՞նչ իմանամ»,- ասում է քաղաքագետն ու հավելում, որ եթե կուսակցությունները քաղաքականապես հասուն չեն լինում, էդ խորհրդարանական համակարգին չեն անցնում:

Լևոն Շիրնյանը հիշեցնում է, որ դեռ երկու տարի առաջ ինքն այն պնդում էր, որ հնարավոր չէ քաղաքական կուսակցությունների առողջ համակարգ չունենալով հանդերձ՝ անցնել խորհրդարանական հանրապետության մոդելի:

Քաղաքագետը նկատում է նաև, որ կուսակցության անդամները լքում են ՀՀԿ-ն, որպեսզի այլ խմբերում կարողանան լուծել իրենց հարցերը, մտնեն խորհրդարան, վերածվեն ճնշման խմբերի և ունենան իրենց փայաբաժինը:

«Տեսե՛ք, դրա համար էլ երկրի ճգնաժամը հաղթահարելու ծրագիր չեն ներկայացնում, չունեն արտաքին կամ ներքին քաղաքականության վերաբերյալ հայեցակարգային քննարկումներ, արտագաղթի կասեցման վերաբերյալ քննարկում չկա՝ դա նրանց չի հետաքրքրում. նրանց նպատակը խորհրդարան մտնելն է»,-նկատում է քաղաքագետը և ավելացնում. «Մղվում են խորհրդարան, որպեսզի պաշտպանեն իրենց ու իրենց խմբային շահերը, և կարողանան բարգավաճել»: